A Deputación de Pontevedra activa un novo espazo na súa páxina web destinado á xuventude

A Deputación de Pontevedra lanzou un novo espazo na súa páxina web destinado á xuventude da provincia. Así o deu a coñecer en conferencia de prensa o presidente provincial, Luis López, quen avanzou as novidades desta sección na que se pretende “agrupar todas as liñas e actuacións do goberno provincial dirixidas á mocidade e servir como punto de referencia para o persoal técnico das áreas de xuventude dos municipios da provincia”.
López incidiu na importancia desta nova sección web para “favorecer o aproveitamento óptimo dos recursos, promover accións máis efectivas e coordinadas e impulsar o crecemento do asociacionismo xuvenil”.
No novo espazo web inclúense todos os programas de actividades, subvencións e concursos dirixidos á xuventude e promovidos polos distintos servizos da Deputación. Bríndase ademais información sobre instalacións e espazos que se poden solicitar para organizar eventos e poñer en marcha iniciativas; e as ofertas de prácticas profesionais, visitas escolares e oportunidades de mobilidade internacional.