Ineo remata o ano cun obradoiro sobre novas estratexias de mercadotecnia para o Nadal

A Asociación Ineo de empresas tecnolóxicas galegas, a través da súa Oficina Acelera Peme, porá o foco nas máis avanzadas metodoloxías de mercadotecnia no seu último obradoiro do ano. Trátase do seminario en liña Estratexias de marketing para campañas do Nadal e rebaixas: impacta e vende máis. Será o vindeiro 18 de decembro, de 9.30 a 11.30 horas, en formato de obradoiro online. As inscricións están abertas na Rede.
O obxectivo será ensinar a deseñar campañas efectivas (aprender a crear estratexias de mercadotecnia dixital adaptadas á tempada do Nadal ou de rebaixas, incluíndo promocións, anuncios e contido atractivo), optimizar o orzamento publicitario (coñecer ferramentas e técnicas para maximizar o retorno de investimento en campañas de Nadal e rebaixas) e crear contido emocional e persuasivo (dominar o deseño de mensaxes e creativos que conecten coa audiencia e potencien as vendas en datas clave). Mostrarase tamén como segmentar audiencias estratexicamente (aprender a identificar e dirixirse aos segmentos de mercado máis relevantes para aumentar a efectividade das campañas) e como medir e analizar resultados (adquirir habilidades para avaliar o desempeño das campañas mediante métricas clave, co fin de realizar axustes e mellorar futuras estratexias).