Parallels Desktop consegue a autorización para correr Windows 11 nos últimos Mac

Dende que os novos ordenadores persoais de Apple fan uso de procesadores baseados en arquitectura ARM teñen un problema para moitos usuarios, afeitos a poder empregar os seus equipos para correr Windows, sen do imposible facer uso do sistema de arranque dual BootCamp, pero curiosamente a aplicación de virtualización Parallels Desktop conseguiu facer correr aplicacións para Windows 11, aínda que este xeito de operar quedaba no limbo, xa que Windows 11 para ARM estaba limitada a un número de equipos moi reducidos entre os que non figuraban os de Apple.
Pero a situación vén de mudar, e Microsoft xa autoriza o uso das versións para ARM de Windows 11 en Parallels Desktop para Mac, aínda que advirten de que se corremos Windows 11 nun equipo con procesador M1 ou M2 teremos algunhas limitacións por mor de capas de virtualización que non están soportadas polo momento, o que afectaría a correr aplicacións para Android e Linux dentro de Windows, ao uso de Windows Sandbox e á tecnoloxía de seguridade VBS, detalles que só importarían a usuarios moi específicos. Pola contra, unha limitación que si afectaría sería a relativa a DirectX 12 e OpenGL3.3, ou sexa, que a tecnoloxía sobre a que corren a meirande parte dos xogos para Windows non contaría con soporte oficial en equipos de Apple cos novos procesadores.
Temos así que Parellels Desktop pode ser unha solución moi axeitada para utilizar aplicacións e ferramentas de Windows 11 dentro de macOS en equipos con procesadores Apple Silicon, sempre que sexamos conscientes de que non temos un Windows 11 completo, senón unha versión que correría cun magnífico desempeño as aplicacións de produtividade, pero tería problemas cos videoxogos.