Código Cero - Diario Tecnolóxico de Galicia

O CPR Montecastelo gaña por 2º ano a Liga Maker Drone do ITG e a Fundación Barrié

S. P. — 2026-05-08T21:39:39Z

Deseñar, programar e voar un sistema sobre un dron para realizar tarefas de mantemento en altura e previr así accidentes laborais. Ese foi o reto que tiveron que superar os máis de 170 estudantes participantes da V Liga Maker Drone, impulsada pola Fundación Barrié e o centro tecnolóxico ITG (Instituto Tecnolóxico de Galicia). Para simulalo, e por primeira vez na historia da liga, os escolares enfrontáronse a un escenario en movemento, consistente nun aeroxerador de 10 metros de altura, sobre o que deberon proxectar un líquido en catro puntos sinalados, ademais de atravesar as súas aspas para realizar tres recollidas de material.
Dos 17 centros escolares das catro provincias galegas que competiron para mostrar as solucións que desenvolveron para responder o reto da liga, o que se alzou como equipo gañador do torneo, por segundo ano consecutivo, foi o CPR Plurilingüe Montecastelo de Vigo, por conseguir levar a cabo a misión no menor tempo.
O premio foi entregado por Inés Rey, alcaldesa da Coruña; Pilar Romero Vázquez-Gulías, presidenta da Fundación Barrié; e Carlos Calvo Orosa, director xeneral de ITG.
A colaboración especial nesta edición de ENAIRE, o xestor da navegación aérea en España, permitirá que o equipo gañador goce dunha exclusiva visita ao Centro de Control de Área Terminal de Santiago de Compostela. Durante esta experiencia, os estudantes coñecerán de primeira man o funcionamento do sistema de xestión do tráfico aéreo e o papel que desempeñan as infraestruturas e os profesionais que garanten a seguridade e eficiencia do espazo aéreo.
Ademais, houbo outros catro equipos cuxa labor foi recoñecida: o IES Francisco Daviña Rey de Monforte de Lemos, recibiu o premio ao mellor deseño; o CPR As Acacias de Vigo, obtivo un recoñecemento por presentar a solución máis disruptiva; o IES Isaac Díaz Pardo de Sada (A Coruña) conseguiu o premio á destreza en voo; e o IES Poeta Díaz Castro, de Guitiriz (Lugo), o premio á mellor presentación.
A xornada final de exhibición tivo lugar este venres 8 de maio no Coliseum da Coruña, contando coa asistencia de máis de 1.000 membros da comunidade educativa como espectadores. Así, ao longo da mañá, os máis de 170 estudantes de segundo de Educación Secundaria Obrigatoria (ESO) demostraron as competencias e habilidades STEM (das siglas en inglés Ciencia, Tecnoloxía, Enxeñería e Matemáticas) adquiridas ao longo do curso escolar grazas á súa participación na Liga Maker Drone, unha iniciativa que ten como fin último o fomento das vocacións científico-tecnolóxicas das novas xeracións.
E é que, tras recibir a formación específica impartida en cada un dos centros, os equipos participantes tiveron que idear, deseñar e programar unha solución dron capaz de realizar traballos en altura. Para iso, a cada un dos centros facilitóuselles un vehículo aéreo non tripulado, formación e orientación por parte da organización. Ademais, por primeira vez nas cinco edicións da liga, os colexios participantes deberon ter en conta, á hora de deseñar a súa solución, a dificultade engadida de que o escenario do desafío, de 30 metros de ancho por 10 metros de altura, contase con elementos móbiles.
Outra novidade da competición desta edición foi que os sistemas dron de cada equipo deberon realizar unha dobre función. En primeiro lugar, proxectar un líquido en catro zonas do escenario (simulando pintura ou unha capa protectora na estrutura) e logo recoller tres caixas de ferramentas na parte máis alta do escenario para depositalas, unha a unha, nun contedor situado o chan.
Trátase dunha aplicación real da tecnoloxía enfocada á prevención de accidentes laborais, especialmente aqueles derivados de caídas, que representan unha porcentaxe significativa dos sinistros graves. De feito, só en España, en 2024 producíronse máis de 27.000 accidentes laborais vinculados a traballos en altura, lembraron dende a organización do certame.
Solución gañadora – CPR Plurilingüe Montecastelo
Presentou un dron autónomo para limpeza de aspas de aeroxeradores mediante pulverización de auga. O sistema integra un depósito intercambiábel, minibomba de corrente continua, tubo de condución e embocadura direccional, controlados por un microcontrolador ESP32 con comunicación ESP-NOW. A innovación principal radica no mecanismo de agarre motorizado con dous motorredutores, substituíndo o sistema orixinal de suxeición manual, o que mellora robustez, precisión e estabilidade operativa. Adicionalmente, incorpora sensores TOF para medición de distancia, sinalización LED e cámara Wi-Fi para supervisión en tempo real, optimizando a manexabilidade e seguridade do piloto.

Resident Evil Requiem recibe un minixogo de balde

Redacción — 2026-05-08T19:00:00Z

Resident Evil Requiem recibe hoxe un novo modo de xogo gratuíto baixo o título Leon must die forever, unha proposta centrada na acción frenética protagonizada por Leon S. Kennedy que xa está dispoñible en PlayStation 5, Nintendo Switch 2, Xbox Series X|S, Steam, Epic Games Store e GeForce NOW.
Capcom presenta este contido adicional como un minixogo desbloqueable tras completar a campaña principal de Resident Evil Requiem, permitindo revisitar distintas zonas xa coñecidas do título mentres os xogadores se enfrontan a versións máis poderosas dos inimigos e ao xefe final nunha carreira contrarreloxo. O modo inclúe cinco niveis de dificultade progresivos e un sistema de habilidades especiais para Leon que se activa enchendo unha barra de melloras mediante a derrota de inimigos.
Cada partida modifica tanto a orde das áreas como as habilidades dispoñibles, buscando aumentar a rexogabilidade desta modalidade adicional. O anuncio chega ademais acompañado dunha actualización con diversas correccións de erros en todas as plataformas e novas funcións na versión para PC, que agora incorpora compatibilidade coas características avanzadas do mando DualSense de Sony, incluíndo gatillos adaptativos, resposta háptica e sensores de movemento.
Capcom lembrou que o 30 de xullo chegarán as primeiras figuras amiibo baseadas na saga Resident Evil, centradas nos personaxes Grace Ashcroft e Leon S. Kennedy.

Tráiler de Leon must die forever

A RAG abre o luns 11 a semana grande das Letras Galegas, que inclúe actividades na Rede

S. P. — 2026-05-08T17:00:00Z

A Real Academia Galega abrirá o luns 11 de maio a semana grande das Letras Galegas na cidade onde naceu a autora á que lle dedica este 17 de maio, Begoña Caamaño. A axenda será polo tanto un itinerario dende Vigo ata Santiago, seguindo o percorrido vital, xornalístico e literario de Begoña Caamaño (1964-2014).
Así, a Escola Superior de Arte Dramática de Galicia (ESADG) acollerá a presentación na cidade olívica do documental Begoña Caamaño: navegar no pracer do azul (19 horas), no que participou alumnado do centro interpretando escenas das novelas da homenaxeada. Xa o Día das Letras Galegas, o Teatro Principal da capital galega acollerá o pleno extraordinario da institución (12 horas). Ana Romaní, Marilar Aleixandre e Víctor F. Freixanes pronunciarán as alocucións sobre a escritora e xornalista. Ambos os actos son de entrada libre ata completar a capacidade dos auditorios. A sesión do 17 de maio poderá ademais seguirse en directo dende academia.gal e a canle de Youtube da RAG.
A presentación do documental na ESADG será un encontro aberto a todo o público, unha ocasión especial para gozar do filme nunha pantalla grande e conversar coas persoas que fixeron realidade o filme. O presidente da RAG, Henrique Monteagudo, abrirá o acto acompañado do director da escola, Daniel González Salgado, e Beatriz Caamaño, irmá da autora. Tras a proxección, o académico correspondente Ramón Nicolás conducirá o coloquio dos directores, Damián Varela e Alba López, e o vicedirector da ESADG, Roberto Pascual, que coordinou a colaboración do centro educativo no documental. O filme, realizado por Miramemira, contou co apoio económico da Deputación da Coruña, a Xunta de Galicia e o Ministerio de Ciencia, Innovación e Universidades, e pode verse na sección das Letras de academia.gal e na canle de Youtube da RAG.


Begoña Caamaño, escritora viguesa homenaxeada este ano nas Letras Galegas

No documental, a literatura de Begoña Caamaño, atravesada pola reinterpretación feminista dos mitos clásicos, dialoga coa memoria íntima e colectiva no retrato coral que van ganduxando, entre outras voces, a súa irmá Beatriz; a actriz viguesa Maika Aguado, amiga da infancia de Begoña Caamaño; a xornalista Amanda Álvarez, estreitamente vinculada a ela dende os seus inicios profesionais en Vigo; o académico Víctor F. Freixanes, con quen cadrou primeiro en Radio Popular de Vigo e que pasado o tempo sería o editor en Galaxia das súas dúas novelas; a especialista en Historia Antiga da Universidade de Vigo Susana Reboreda, quen constatou antes da publicación da súa ópera prima, Circe ou o pracer do azul, o gran dominio que tiña Begoña Caamaño dos mitos gregos; e a súa compañeira na Radio Galega e académica Ana Romaní e mais a crítica literaria María Xesús Nogueira (unha das primeiras estudosas da súa obra), coautoras de Volveredes brindar por min. Unha biografía de Begoña Caamaño, acabada de saír do prelo.
As personaxes de Begoña Caamaño toman corpo e presenza na pantalla en cápsulas dramatizadas. Lucía Costas Pérez, Sabela Pereira Rodríguez, Alba Rocha, Daniel Vicente Ferreira e Julio Alonso Rodríguez, estudantes da ESAD Galicia, interpretan fragmentos de Circe ou o pracer do azul (2009) na praia de Barra e levan á escena a Sherezade, a narradora das Mil e unha noites, arredor da cal a escritora pretendía pechar a súa triloxía sobre os mitos. A bailarina Elsa Pereira é quen se converte na protagonista de Morgana en Esmelle (2012), acompañada pola narración na voz da propia Begoña Caamaño nun dos documentos sonoros do arquivo da CSAG que se integran no filme.
Cóntase ademais coas nenas Helena Rodríguez Otero e Laura Diniz Fontán, da escola de teatro Imaxinatea Labcreativo de Vigo, nos papeis de Begoña Caamaño e a súa amiga Maika Aguado na infancia. A praia do Tombo do Gato é nesta pasaxe o espazo de maxia e liberdade que rememora a voz en off de Maika Aguado nunha conmovedora lembranza que identifica na nena que foi Begoña Caamaño o agromar da creadora na que se convertería.
A película documental dálle tamén voz á mocidade en relación cos grandes temas da obra literaria de Caamaño, o seu exercicio como xornalista e mais o seu activismo. O IES Castelao e o IES Alexandre Bóveda de Vigo son deste xeito parte dos escenarios de reflexión das novas xeracións, así como do club de lectura que tamén aparece no filme.
O antigo Instituto Coia 2 foi precisamente o pasado 10 de abril escenario da primeira presentación do documental, no marco do acto de homenaxe do centro educativo á autora. A RAG tamén elixiu outro centro educativo vigués, o CEIP O Pombal, no barrio da infancia de Begoña Caamaño, para a presentación de Primavera das Letras. An Alfaya, compañeira no Coia 2 e na carreira da homenaxeada, asina a historia para o público infantil sobre a autora que pode descargarse na web do proxecto, un texto teatral, para ler e representar dentro e fóra das aulas, que ilustrou Laura Romero. A cidade natal da autora acollerá ademais, xa en outono, o Simposio das Letras Galegas 2026.
Pleno extraordinario do 17 de maio e propostas nas Rede
O acto central do Día das Letras Galegas será no Teatro Principal de Santiago de Compostela, a cidade onde Begoña Caamaño viviu dende 1992, cando comezou a traballar na redacción central da Radio Galega, ata o seu pasamento en 2014, vítima dun cancro. A sesión extraordinaria comezará ás 12:00 e contará con tres alocucións académicas sobre a literatura e o xornalismo de Begoña Caamaño a cargo de Ana Romaní, Marilar Aleixandre e Víctor F. Freixanes. A música en vivo correrá a cargo de Sofía Espiñeira e pechará a sesión o presidente da RAG, Henrique Monteagudo. O público que asista será agasallado coa publicación conmemorativa Begoña Caamaño presenta Circe ou o pracer do azul e Morgana en Esmelle, que reúne dous textos da autora sobre as súas dúas novelas, dispoñ íbel xa en versión dixital na web da RAG. A RAG organiza a celebración co apoio do Concello de Santiago de Compostela, a Xunta de Galicia e o Ministerio de Ciencia, Innovación e Universidades.
Alén dos actos presenciais arredor da figura e o legado de Begoña Caamaño, a Academia reforzou a divulgación na Rede. Ademais do documental e o mencionado proxecto Primavera das Letras, está a producir a serie de reels É o tempo de Begoña Caamaño e acaba de estrear o seu primeiro videopódcast, Colchas de voces, no que se abordan asuntos que preocuparon e ocuparon a Begoña Caamaño escritora e xornalista, a activista e a amiga. As convidadas do primeiro episodio son as integrantes do dúo musical Fillas de Cassandra, que comparten con Begoña Caamaño a súa revisión feminista e creativa da mitoloxía clásica.

Intel podería ter chegado a un acordo para fabricar chips para Apple

Redacción — 2026-05-08T16:30:00Z

Apple e Intel alcanzaron un acordo preliminar para fabricar chips destinados a dispositivos da firma de Cupertino, segundo avanzou The Wall Street Journal. A operación suporía un importante respaldo para o negocio de fabricación por contrato de Intel e encaixa coa estratexia da Administración Trump de reforzar a produción de semicondutores en territorio estadounidense.
As negociacións entre ambas empresas prolongáronse durante máis dun ano e cristalizaron nos últimos meses nun acordo formal aínda inicial, segundo fontes coñecedoras das conversas citadas polos medios estadounidenses. A nova impulsou a cotización de Intel, que chegou a subir arredor dun 15 %, mentres que as accións de Apple tamén rexistraron avances.
O pacto permitiría a Intel asegurar unha fonte estable de pedidos dun dos maiores fabricantes mundiais de electrónica de consumo, fortalecendo ao tempo a súa credibilidade como fundición de chips nun momento no que tenta recuperar terreo fronte a TSMC, líder do sector. Non transcendeu que compoñentes concretos produciría Intel para Apple nin en que dispositivos serían empregados.
A Casa Branca xogaría un papel relevante na aproximación entre as dúas compañías. Segundo The Wall Street Journal, representantes da Administración estadounidense estiveron promovendo activamente que grandes firmas tecnolóxicas colaborasen con Intel para reforzar a industria local de semicondutores. Un funcionario citado por Reuters recoñeceu que o Goberno leva tempo tentando «xerar negocio para Intel», aínda que asegurou que o apoio non responde á participación accionarial estatal na compañía, senón á súa importancia estratéxica como fabricante estadounidense.
Apple depende actualmente de TSMC para a produción dos seus chips máis avanzados, mais a elevada demanda das liñas de fabricación da compañía taiwanesa por parte de empresas centradas na IA, como nVIDIA ou AMD, estaría levando a Apple a procurar alternativas e maior capacidade produtiva. Tim Cook xa advertira na última presentación de resultados de limitacións de subministración que afectaron ás vendas do iPhone.
O acordo tamén suporía un reencontro industrial entre Apple e Intel anos despois de que Apple abandonase os procesadores Intel nos Mac para adoptar os seus propios chips Apple Silicon.
Intel leva meses intensificando os seus esforzos para recuperar posicións no sector. A empresa pechou distintos acordos co Goberno estadounidense e recibiu investimentos de compañías como nVIDIA e SoftBank, mentres o seu conselleiro delegado, Lip-Bu Tan, impulsa unha profunda reorganización do negocio. Segundo as informacións publicadas, o secretario de Comercio dos EE.UU., Howard Lutnick, reuniuse en varias ocasións con directivos de Apple, nVIDIA e mesmo con Elon Musk para fomentar colaboracións con Intel.

O Consello da Cultura Galega pon na Rede o Libro das amigas en homenaxe a Begoña Caamaño

S. P. — 2026-05-08T16:30:00Z

Proseguen as homenaxes das nosas entidades á escritora e xornalista Begoña Caamaño (Vigo, 1964-Santiago, 2014). Desta volta, o Consello da Cultura Galega anunciou a edición facsimilar de Libro das amigas, que inclúe 24 contribucións de diferente tipo que a contorna máis próxima da autora de Morgana en Esmelle lle dedicou no primeiro cabodano. O libro das amigas tamén se pode descargar en formato dixital dende a web do CCG.
A presidenta do CCG, Rosario Álvarez, xunto con Amanda Álvarez e Concha de la Fuente en representación do grupo de amigas, mais a irmá de Begoña, Bea Caamaño, presentaron a edición facsimilar no estoxo que conforma a Colección das Letras Galegas desta institución. “Non é a voz de Begoña a que contén o libro pero é Begoña a través do reflexo que nos devolven as amigas” apuntou Rosario Álvarez sobre a publicación, que, como dixemos, tamén ten edición dixital e xa se pode descargar desde a web do CCG.
Cada ano, con motivo do Día das Letras Galegas, a institución rescata unha obra para honrar o legado da figura homenaxeada. Nesta ocasión escolleuse unha obra especial, editada inicialmente en 2015 por un grupo de amigas de Begoña Caamaño no seu primeiro cabodano. No limiar da publicación, a presidenta explica que “optamos por facilitar a achega á personalidade, pensamento e legado de Begoña Caamaño, non a través da súa propia obra, senón do reflexo que nos devolven os textos de dúas ducias de mulleres, da súa ampla contorna intelectual e emocional, que se ispen deixando abrollar sentimentos, lembranzas e emocións, aínda avaladas polo transo do seu pasamento”.
Na presentación, a presidenta Álvarez destacou que a homenaxe dura todo o ano e, “aínda que o esforzo se fai arredor do 17 de maior temos previstas outras actividades”.
En representación das nove amigas que promoveron no seu momento a publicación, Amanda Álvarez explicou que no “libro das amigas hai artigos académicos, hai poemas… pero, sobre todo, hai moita emoción”. Ademais dela, participaron no libro Ana Romaní, Andrea Nunes, Bea Caamaño, Camiño Noia, Carmen Panero, Chus Nogueira, Faia Díaz Novo, Goretti Sanmartín Rei, María del Río, Mª Pilar García Negro, María Reimóndez, María Rúa, María Xosé Porteiro, María Xosé Queizán, Merce Teixeiro, Mercedes Queixas, Paula Carballeira, Pim Patinho, Rosa Martínez, Sesé Canitrot, Uxía, Xulia Alonso e Marica Campo.
Aínda que non participou no libro pero si no acto de homenaxe paralelo, Concha dela Fuente apuntou que “neste libro comunitario que se lle chamou o libro géyser, está un pouco de todas aquelas persoas que rodeamos a Begoña”.
Ademais dos textos, inclúense catro entrevistas: unha ao fío da presentación de Morgana en Esmelle en Vigo; outra do programa de televisión Zigzag Diario; outra entrevista da Galega; mais a entrevista que lle fixo Manuel Vidal Villaverde no desaparecido xornal Galicia Hoxe. E, de peche, a carta que Begoña Caamaño lle escribiu á cantante Uxía Senlle antes de morrer e na que desexa “que esteades todas xuntas, todos xuntos, para vos consolar mutuamente e, cando eu xa teña adormecido para sempre, volveredes a brindar por min, se é que vos parece que o merezo”.
Concerto das letras Galegas
Outra das actividades do CCG para conmemorar o Día das Letras Galegas é o concerto institucional que terá lugar no Auditorio Mar de Vigo o 16 de maio (20:30 horas). Poderá seguirse en directo a través da web do CCG e o propio día das letras na segunda canle da Galega. O programa da 16ª edición do Concerto das Letras Galegas inspírase nos textos literarios e no labor xornalístico e radiofónico da autora homenaxeada. Trátase dun concerto composto por 14 pezas que transitan do íntimo ao festivo, no que Uxía Senlle rende homenaxe á memoria dunha das súas grandes amigas. O concerto é de entrada libre e gratuíta.
Begoña Caamaño no Álbum de Galicia
Ademais de todo o devandito, o CCG informou dunha completa entrada sobre a figura de Begoña Caamaño na súa enciclopedia en liña de personalidades galegas. Amanda Álvarez González é a autora da entrada no Álbum de Galicia na que a cualifica como “unha voz imprescindíbel no feminismo galego”. A entrada do Álbum de Galicia salienta a súa faceta como xornalista e activista sindical e política, e tamén do seu labor en numerosas asociacións feministas e sindicais. Saliéntase por suposto a súa creación literaria: compuxo letras para a cantante Uxía e María Fumaça e publicou dúas novelas: Circe ou o pracer do azul (2009) e Morgana en Esmelle (2012). Este segundo título recibiu numerosos premios, entre os que salientan o Premio Ánxel Casal ao mellor libro de ficción da Asociación Galega de Editores. Nos seus derradeiros anos estaba escribindo dúas novas novelas, unha delas coa súa bisavoa como protagonista.

Gadis celebra o legado de Begoña Caamaño na súa web das Letras Galegas

S. P. — 2026-05-08T16:00:00Z

Gadis presentou as accións culturais que leva a cabo con motivo do Día das Letras Galegas no supermercado da rúa Barcelona de Vigo, cidade de orixe de Begoña Caamaño, a homenaxeada deste ano no 17 de maio. A campaña, indicou a empresa, será “un tributo á figura e á pegada da escritora e xornalista viguesa, ademais dun recoñecemento á cultura de todos os galegos e galegas”. Temos todos os detalles da iniciativa, que volve contar co apoio da Secretaría Xeral da Lingua, na web www.gadisletrasgalegas.gal.
A campaña inclúe a publicación de Lenzos, as letras en cor, un caderno baseado nos libros Morgana en Esmelle e Circe ou o pracer do azul, onde a xornalista e escritora recreou os mitos para darlles novas lecturas, máis abertas e contemporáneas.
O vindeiro sábado 16 de maio, a cadea de supermercados entregará de forma gratuíta, ata fin de existencias, 30.000 unidades de Lenzos, as letras en cor, ademais de 40.000 marcapáxinas e 40.000 bolsas de papel con deseños especiais conmemorativos desta celebración.
Na web www.gadisletrasgalegas.gal pódese descargar a versión dixital das diferentes láminas que compoñen o caderno coa chamada “Deixa voar a imaxinación e entra nun mundo onde as letras tamén se transforman en cores. Porque ás veces, cando un lenzo se enche de cor, a historia goza dunha nova vida”.
Homenaxe a Begoña Caamaño
Gadis fixo unha entrega simbólica deste material cultural a Beatriz e Carmen Caamaño, irmá e sobriña, respectivamente, de Begoña Caamaño, nun emotivo encontro no que se puxo en valor a figura da autora e xornalista viguesa que entendía a cultura como algo vivo, que se cuestiona e se reescribe.
“Quixemos estar hoxe en Vigo, cidade de orixe de Begoña, coa súa irmá Beatriz, como un recoñecemento a súa figura e obra. Entendemos a cultura galega como algo noso, no que todos os galegos e galegas temos cabida. Desde fai moitos anos, as nosas bolsas da compra enchen de cultura miles de fogares da nosa comunidade nestas datas”, explican desde a empresa 100% galega.
Na xuntanza participaron, por parte das institucións, María Coutinho, subdirectora xeral de Planificación e Dinamización Lingüística da Xunta de Galicia, e Patricia Iglesias, concelleira delegada de Atención á Cidadanía do Concello de Vigo. En representación de GADISA Retail, Pablo Louro, delegado de área en Pontevedra, José Luis Fernández Astray, director de Comunicación, María Eimil, coordinadora de Comunicación, e Mª Teresa Pérez, encargada do supermercado.
Dinamización cultural de Galicia
Gadis lembrou que o impulso da cultura é un dos seus máis firmes compromisos. De feito, máis do 30% das accións do seu plan de Responsabilidade Social Corporativa están vencelladas á cultura. Neste eido, destaca o seu apoio á literatura e a os autores que escriben en galego. Nos últimos vinte anos, a compañía editou 430.000 exemplares, potenciando a obra de autores consagrados e das novas promesas.

FEMUPO impulsa forma 20 mulleres no manexo profesional de drons

S. P. — 2026-05-08T15:30:00Z

A Federación pola Igualdade das Mulleres da Provincia de Pontevedra (FEMUPO) pon en marcha unha nova edición do Proxecto Ás, unha iniciativa innovadora que permitirá formar este ano a 20 mulleres da provincia de Pontevedra no manexo profesional de drons, grazas ao financiamento da Deputación de Pontevedra.
Tras o éxito acadado nas edicións anteriores e a elevada demanda rexistrada, FEMUPO quixo reforzar este programa co obxectivo de “seguir promovendo a igualdade de oportunidades e facilitar o acceso das mulleres a sectores tecnolóxicos emerxentes, onde a presenza feminina continúa sendo minoritaria”.
O proxecto ofrece unha formación gratuíta e oficial de operadora de UAS nas categorías A1/A3 e A2, cun total de 24 horas de duración, combinando contidos teóricos, formación práctica e exame oficial. As clases desenvolveranse en modalidade presencial na cidade de Pontevedra.
Ademais da formación especializada, as persoas participantes que superen os exames recibirán un dron de agasallo, co obxectivo de facilitar a continuidade da práctica e favorecer futuras oportunidades laborais ou de emprendemento.
“O Proxecto Ás naceu coa intención de abrir portas e crear referentes femininos no ámbito tecnolóxico. O éxito das edicións anteriores demostra que existe interese, capacidade e moito potencial entre as mulleres da nosa provincia”, destacan desde FEMUPO.
A iniciativa busca non só capacitar tecnicamente ás participantes, senón tamén fomentar o apoderamento feminino e a confianza das mulleres en profesións tradicionalmente masculinizadas, vinculadas á innovación e ás novas tecnoloxías.
As prazas son limitadas e o prazo de inscrición xa está aberto na Rede.
O Proxecto Ás está impulsado por FEMUPO coa colaboración da Deputación de Pontevedra, dentro do compromiso compartido por promover a igualdade real e efectiva e mellorar a empregabilidade das mulleres da provincia.

Valentín García amosa en Estocolmo o Proxecto Nós e outras iniciativas innovadoras pola lingua

S. P. — 2026-05-08T15:00:00Z

O secretario xeral da Lingua, Valentín García, participou estes días en Estocolmo en diversas citas convocadas pola Rede Europea para a Promoción da Diversidade Lingüística, onde deu conta ante os representantes doutros territorios con linguas propias dos proxectos do seu departamento (e por extensión da Consellería de Cultura) para dinamizar o galego, “un traballo realizado ao abeiro do Pacto pola Lingua moi recoñecido e valorado pola rede”, apuntou.
García expuxo ante o Comité de Dirección e na Asemblea Xeral da entidade “as medidas postas en marcha a curto prazo para incentivar o uso do idioma en moi diversos ámbitos”, así como diversas accións máis amplas que implica, entre outras, a actualización do Plan Xeral de Normalización da lingua galega”.
Explicou que “é moi positivo para nós dar a coñecer polo miúdo a nosa proposta para prestixiar a lingua e que poidamos ser un exemplo a seguir para outras comunidades lingüísticas semellantes á nosa en toda Europa”.
Sinalou que “estes encontros”, á parte de para fortalecer os vínculos”, tamén nos serven para enriquecernos e coñecer outro tipo de estratexias, á vez que nos achegamos aos últimos avances, como os proxectos que teñen que ver co eido dixital e a intelixencia artificial”. Unha liña na que, dixo, “Galicia tamén ten moito que dicir”, referíndose a iniciativas como o Proxecto Nós, impulsado pola Secretaría Xeral e a USC e enfocado en que o galego estea presente nas distintas aplicacións e plataformas, poñendo o foco nas ferramentas de intelixencia artificial, cada vez máis presentes nas nosas vidas.
Por outra banda, o secretario xeral da Lingua do Goberno galego tamén asistiu este venres 8 á Conferencia da Rede Europea para a Promoción da Diversidade Lingüística que este ano levou por título 25 anos da Carta Europea en Suecia: logros, lagoas e direccións futuras en Suecia e máis aló. Trátase dun encontro que versa sobre as directrices da Carta Europea das Linguas, a súa aplicación e a súa actualización. Unha folla de ruta que, lembrou, “seguimos como unha das bases para desenvolver o noso Pacto pola Lingua, tendo en conta as súas recomendacións”.
A Rede Europea para a Promoción da Diversidade Lingüística foi fundada en 2008 integrando institucións académicas, organismos de diversa natureza e gobernos rexionais e nacionais de diferentes países europeos destinada a crear un ámbito no que o multilingüismo, a diversidade lingüística e a aprendizaxe das linguas consideradas minoritarias se promovan activamente en todas as franxas de idade da poboación europea. A Xunta de Galicia está integrada neste proxecto desde a súa fundación e forma parte do comité executivo.
Máis sobre Nós
Nós é un proxecto galego que permitirá xerar os recursos dixitais e lingüísticos precisos para facilitar o desenvolvemento de aplicacións baseadas en Intelixencia Artificial (IA) e Tecnoloxías da Linguaxe (TL) tales como asistentes de voz, tradutores automáticos e axentes conversacionais en lingua galega.
O obxectivo central é “promover a presenza dixital do galego, garantindo que a nosa lingua non fique excluída dos novos desenvolvementos TIC, mediante a creación dunha ampla variedade de ferramentas e recursos de alta calidade que serán postos, de xeito gratuíto, a disposición de calquera institución, organización ou empresa que queira desenvolver un produto tecnolóxico, aplicación ou servizo que incorpore o galego”. Deste xeito, ademais de garantir os dereitos lingüísticos das galegas e galegos no mundo dixital, tamén se contribuirá á modernización e dixitalización do ecosistema de empresas galegas e á creación de valor con novos produtos que empreguen a lingua galega.

Deputación e Telefónica impulsan en Digital Tourist 2026 un modelo de turismo intelixente para Ourense

Redacción — 2026-05-08T14:40:45Z

A Deputación de Ourense e Telefónica avanzan no desenvolvemento de Ourense Cerca DeTi, un proxecto co que a provincia busca consolidarse como un destino turístico intelixente de referencia mediante o uso de tecnoloxías avanzadas, servizos personalizados e ferramentas de análise de datos orientadas á mellora da experiencia dos visitantes.
Os avances da iniciativa déronse a coñecer no congreso Digital Tourist 2026, celebrado en Benidorm baixo a organización de AMETIC, durante un workshop protagonizado por Frederic Vieuxmaire, responsable de Smart City e Turismo de Telefónica España, e Marcos Valiño, director de Transparencia e Goberno Aberto da Deputación de Ourense.
O proxecto intégrase coa Plataforma Intelixente de Destinos (PIDI) impulsada por Segittur e incorpora tecnoloxías como Internet das Cousas (IoT), realidade aumentada, realidade virtual, big data e machine learning para ofrecer información en tempo real sobre fluxos turísticos, ocupación, estacionalidade ou hábitos de consumo. O obxectivo é facilitar a toma de decisións e adaptar a planificación turística ás necesidades de cada momento.

: Marcos Valiño, director de Transparencia e Goberno Aberto da Deputación de Ourense, e Frederic Vieuxmaire, responsable de Smart City e Turismo de Telefónica España

Frederic Vieuxmaire destacou que a iniciativa reforza a aposta de Telefónica pola transformación dixital do sector turístico e polo desenvolvemento de territorios máis intelixentes e sustentables. Segundo explicou, a combinación de tecnoloxía, interoperabilidade e análise de datos permitirá que destinos como Ourense poidan anticiparse á demanda e ofrecer experiencias máis personalizadas e inmersivas aos visitantes.
Marcos Valiño incidiu na intención da Deputación de converter Ourense nun destino turístico intelixente apoiándose nas últimas tecnoloxías e en plena sintonía coa estratexia estatal desenvolvida por Segittur. Durante a súa intervención puxo como exemplos os casos de uso vinculados ao turismo termal, o enoturismo, as visitas autónomas a museos e a análise da rendibilidade do Camiño de Santiago.
A estratexia contempla tamén o despregamento de sistemas intelixentes de acceso, control de aforo e trazabilidade, planificación avanzada de rutas e mecanismos de alerta temperá capaces de detectar situacións de saturación ou incidencias en tempo real. A monitorización da actividade en recintos feirais formará parte igualmente desta infraestrutura tecnolóxica.
O proxecto prevé empregar realidade aumentada e realidade virtual para crear experiencias inmersivas en enclaves naturais e patrimoniais da provincia mediante contidos interactivos e vídeos 360 graos orientados á promoción turística.
Marcos Valiño participou ademais nunha mesa redonda centrada na intelixencia aplicada á mobilidade e ao comportamento dos visitantes, onde abordou cuestións relacionadas coa análise de fluxos turísticos, a distribución territorial da demanda, a capacidade de carga dos destinos e a protección de datos.
A Deputación considera que Ourense Cerca DeTi permitirá avanzar cara a un modelo turístico plenamente dixitalizado, con capacidade para desestacionalizar a demanda, optimizar recursos públicos e favorecer a xeración de impacto económico e investimento na provincia.

A AEPD confirma unha multa de 200.000 euros a Gadisa

Redacción — 2026-05-08T14:30:00Z

A Axencia Española de Protección de Datos (AEPD) confirmou unha sanción de 200.000 euros contra Gadisa e apercibiu á Xunta de Galicia por vulneracións da normativa de protección de datos relacionadas co programa Carné Familiar. A resolución chega tras unha denuncia presentada por FACUA-Consumidores en Acción en xaneiro de 2025.
Segundo explicou a organización de consumidores, Gadisa enviou aos domicilios de beneficiarios do programa autonómico cheques regalo con descontos calculados en función das compras realizadas polos usuarios. FACUA sostén que a cadea de distribución obtivo eses datos mediante unha cesión efectuada pola Xunta sen contar co consentimento previo dos afectados.
A AEPD considera acreditado que existiu unha situación de corresponsabilidade no tratamento dos datos persoais entre a administración galega e a empresa distribuidora, propietaria das cadeas Gadis, Claudio e Ifa Cash. O organismo conclúe que ambas partes incumpriron o artigo 26 do Regulamento Xeral de Protección de Datos (RGPD), que obriga a definir «de xeito transparente e de mutuo acordo» as responsabilidades respectivas cando varias entidades participan no tratamento da información persoal.
Na resolución, a Axencia desestima o recurso presentado por Gadisa contra a sanción inicial e rexeita todos os argumentos expostos pola empresa. Entre eles figuraba a defensa de que non existía corresponsabilidade no tratamento dos datos e que, en todo caso, se trataba dunha infracción «estritamente formal e documental […] sen ningún impacto directo sobre os dereitos fundamentais dos interesados».
A empresa tamén consideraba «desproporcionada» a multa imposta, unha valoración que a AEPD non comparte. O organismo mantén integramente a sanción económica de 200.000 euros.
A Xunta de Galicia xa fora obxecto previamente doutro procedemento sancionador pola mesma actuación vinculada ao Carné Familiar. Nese caso, a AEPD tamén concluíra que se producira unha vulneración do RGPD, aínda que o expediente rematara sen sanción económica para a administración autonómica.

A Xunta mobilizou 4 millóns de euros para a modernización e dixitalización do comercio galego

S. P. — 2026-05-08T11:30:00Z

O director xeral de Comercio e Consumo, Gabriel Alén, fixo balance da convocatoria autonómica de axudas de 2026 destinadas ao impulso da innovación, modernización e sostibilidade do comercio local e artesanal, así como ao desenvolvemento do Plan Estratéxico do Comercio de Galicia 2025-2030, que, segundo dixo, acadou xa un grao de execución do 75 %, con 50 das 74 accións en curso.
No relativo ás axudas ao tecido comercial, viñeron cunha dotación de 4 millóns de euros este ano e un grao de execución do 100 %, sinalou, salientando “que o éxito da convocatoria débese sobre todo á simplificación administrativa, á escoita activa e á adaptación constante aos requirimentos do sector”. Explicou que a orde integra tres grandes liñas de apoio: a mellora estética e funcional dos establecementos comerciais, con axudas de ata 15.000 euros; a dixitalización dos negocios, con achegas de ata 16.000 euros para a mellora de ferramentas tecnolóxicas, presenza dixital e adaptación á facturación electrónica; e a sustentabilidade ambiental, con axudas de ata 2.000 euros para materiais de empaquetado ecolóxicos e reciclados. “O conxunto destas actuacións pode acadar un financiamento de ata 33.000 euros por comercio, cunha intensidade de axuda do 80 %”, dixo.
Alén puxo tamén en valor outras actuacións encamiñadas á dixitalización para impulsar a súa competitividade, como as xornadas de experimentación tecnolóxica desenvolvidas a finais do pasado ano en colaboración con Gaiástech, que permitiron achegar novas ferramentas dixitais ao sector e que se estenderán a distintos puntos de Galicia co obxectivo de divulgar boas prácticas, fomentar a innovación e compartir experiencias de éxito.
Así mesmo, destacou o apoio do Goberno galego ao asociacionismo comercial, subliñando as achegas aos centros comerciais abertos (CCA), cun investimento próximo aos 2,5 millóns en 54 cidades e vilas galegas, co fin de dinamizar e profesionalizar o comercio local. Neste senso, e como mostra da excelencia galega, destacou o galardón e a mención honorífica —respectivamente—que veñen de recibir os CCAs de Ribadeo e Marín nos Premios Nacionais de Comercio. Tamén salientou a colaboración coa Federación Galega de Comercio a través de campañas xa consolidadas como Días Azuis e Merca no teu comercio, así como o novo campus formativo xa en marcha, adaptado ás necesidades reais dos comerciantes e orientado á mellora da súa competitividade.
O director xeral subliñou outras medidas recollidas no Plan Estratéxico do Comercio de Galicia, entre as que destacou o apoio ás prazas de abastos, proxectos de dinamización comercial de vilas senlleiras como o piloto de Vivas Vivas en Ribadavia ou a iniciativa Localízate, dirixida á mocidade de ESO e FP Básica.
“Este curso inscribíronse máis 2.500 alumnos para fase desenvolvida nos centros educativos na que elaboraron propostas para impulsar o comercio local e, actualmente, preto de 1.000 —cos traballos mellor valorados na aula— están a realizar xincanas nas principais prazas de abastos e zonas comerciais das sete cidades galegas”, dixo, engadindo que o martes 12 será a quenda de Ourense.

Bean, un rato inspirado no TrackPoint de IBM

Marcus Fernández — 2026-05-08T11:00:00Z

Ploopy anunciou o lanzamento de Bean, un novo rato inspirado nos clásicos TrackPoint integrados no centro dos teclados de moitos portátiles da marca IBM, pero deseñado como periférico independente e cun enfoque orientado á personalización e ao hardware aberto.
O dispositivo pode reservarse por 69,99 dólares canadenses (uns 43 euros) e destaca por empregar un sensor magnético Texas Instruments TMAG5273 capaz de realizar 20.000 mostras por segundo cunha resolución dixital de 12 bits. Segundo os seus creadores, pode detectar movementos de ata 3 micras, o que lle permite ofrecer un control extremadamente preciso do cursor.
Bean aposta por un formato compacto (84 x 64 x 16 milímetros) e un peso de só 52 gramos, integrando un microcontrolador Raspberry Pi RP2040 a 125 MHz e unha taxa de actualización superior aos 1.000 Hz para reducir a latencia. O sistema de desprazamento tamén incorpora scroll de alta resolución mediante un modo específico activable cun botón, permitindo desprazamento píxel a píxel.
O elemento central do rato é unha pequena superficie de silicona vermella pensada para minimizar a abrasión nos dedos mantendo ao mesmo tempo unha boa adherencia. A estrutura permite un percorrido de ata 11 milímetros en cada eixo, unha cifra superior á habitual neste tipo de solucións, co obxectivo de reducir a fatiga durante o uso continuado.
O periférico incorpora catro botóns con interruptores Omron D2LS-21 e funciona con firmware QMK, ademais de ser compatible con VIA para a configuración de macros, combinacións e funcións avanzadas directamente desde unha aplicación web.
A filosofía aberta segue a liña habitual de Ploopy: todos os ficheiros mecánicos, eléctricos e de firmware están publicados en GitHub, permitindo modificar ou fabricar versións personalizadas. O chasis está realizado mediante impresión 3D, facilitando tanto reparacións como cambios estéticos ou adaptacións deseñadas pola comunidade.
Ploopy comercializa Bean completamente montado, aínda que tamén ofrece documentación técnica e guías para quen queira modificar o dispositivo ou cargar firmware alternativo. As primeiras unidades forman parte dunha fase de reserva dividida en varias quendas de entrega, con envíos inmediatos para os pedidos Early Access e prazos de ata 20 semanas para as reservas posteriores.

O CPEIG recoñece co Premio Iniciativa Empresarial á viguesa Sparc Foundry, pioneira en semicondutores

S. P. — 2026-05-08T10:30:00Z


Edificio Sparc Foundry, en Vigo

Amosar á sociedade o traballo das enxeñeiras e enxeñeiros en informática dentro da sociedade da información e as iniciativas relacionadas co eido das TIC é o obxectivo dos premios da XVIII Noite da Enxeñaría en Informática de Galicia, concedidos polo Colexio Profesional de Enxeñaría en Informática de Galicia (CPEIG). A gala desta edición terá lugar o 12 de xuño no Hotel OCA Porta do Camiño de Santiago, data na que Francisco Díaz-Otero, CEO da empresa viguesa Sparc Foundry, recollerá o Premio Iniciativa Empresarial.
Desde a compañía sinalan que Sparc Foundry avanza en Vigo na creación da primeira foundry comercial de fotónica integrada baseada en semicondutores III-V (chips fotónicos) en España. O xerme da compañía xurdiu hai máis de cinco anos na contorna universitaria da cidade, impulsado por un equipo de investigadores con ampla experiencia en fotónica integrada e na industria tecnolóxica, ao que xa se sumaron máis de vinte profesionais. As obras de construción da súa planta, no Parque Tecnolóxico e Loxístico de Vigo, iniciáronse o pasado mes de xaneiro, e está previsto que estea operativa cara finais de 2027.


Construción edificio Sparc Foundry

Segundo Sparc, a empresa quere reforzar a soberanía tecnolóxica europea e achegar nova capacidade industrial ao continente nun sector estratéxico. Nun contexto no que os semicondutores veñen de consolidarse como unha infraestrutura crítica para a economía dixital, a compañía aspira a cubrir a crecente demanda de dispositivos fotónicos e de alta frecuencia, clave para as telecomunicacións, a automoción, a intelixencia artificial ou o sector aeroespacial.
Alén do seu impacto europeo, Sparc Foundry exercerá un forte efecto tractor no tecido industrial galego, xa que non só promoverá a creación de emprego cualificado e atraerá talento especializado, senón que tamén fomentará o desenvolvemento dun ecosistema industrial e tecnolóxico en Galicia. “Sparc Foundry xa está xerando interese no mercado internacional, máis alá das fronteiras europeas, e sitúase como un dos nodos industriais emerxentes en Europa, contribuíndo a construír unha cadea de valor completa en torno á fotónica”, apuntan desde as súas oficinas na cidade olívica.
Apunta Fernando Suárez, presidente do CPEIG: “SPARC Foundry é hoxe un símbolo de innovación, colaboración e ambición industrial, un proxecto que demostra que desde Galicia é posíbel liderar desenvolvementos tecnolóxicos de alcance global”.
O CPEIG conclúe que Sparc Foundry é un proxecto que encarna de xeito exemplar a capacidade de Galicia para situarse na vangarda tecnolóxica europea.

A Nintendo Switch 2 subirá de prezo o 1 de setembro

Marcus Fernández — 2026-05-08T10:12:16Z

A actual xeración de consolas de videoxogos caracterízanse por un detalle que está a resultar moi frustrante para os consumidores: as consolas, en vez de reducir o seu prezo paulatinamente, increméntano. De feito, a PlayStation 5, tras subir dúas veces de prezo en 12 meses, está a pagar esta situación cunha caída de vendas interanual do 46 %.
Neste contexto temos que Nintendo non pode evitar as consecuencias do incremento de prezo das memorias pola súa escaseza, e terán que repercutilo aos consumidores, anunciando hoxe que a suba de prezos comezará no Xapón o vindeiro día 25, afectando tanto a nova Nintendo Switch 2 como aos distintos modelos de Nintendo Switch (que proporcionalmente experimentarán subas máis importantes). A Switch 2 pasará de 49.980 iens a 59.980 iens (o que supón unha suba do 20 %).
No caso europeo a suba de prezos farase efectiva o 1 de setembro, pasando a custar a Nintendo Switch 2 de 469,99 a 499,99 euros (o que é unha suba de pouco máis do 6 %, moito menos do que soben os prezos no Xapón). A suba de prezo dos vellos modelos de Nintendo Switch en Europa aínda non foi comunicado pola compañía nipoa.
Tamén subirán os prezos do servizo Nintendo Switch Online (sen detallar como será o esquema de prezos en Europa), detalle que non parece relacionado cos prezos das memorias, pero si lembraría ao que está a acontecer coa meirande parte dos servizos de subscrición para o ámbito doméstico (que non cesan de subir de prezo rachando coa tradición de prezos conxelados).

A Cidade das TIC acolle un concerto audiovisual inmersivo de Marta Verde & José Venditti no ciclo (IN)VISUAL

S. P. — 2026-05-08T09:42:10Z

Ao longo deste mes de maio, a cultura dixital contemporánea está máis que presente na cidade da Coruña co proxecto (IN)VISUAL, un novo ciclo de música audiovisual impulsado pola Deputación da Coruña, que ten lugar na Coruña Estudio Inmersivo (CEI), o maior plató de produción virtual de España, situado na Cidade das TIC, onde antes se atopaba a antiga Fábrica de Armas da Coruña.
As experiencias de (IN)VISUAL están programadas os sábados de maio (2, 9, 16 e 23), cun total de catro concertos LIVE AV e un cartel que contará coa presenza dos e das artistas de referencia da cultura audiovisual contemporánea galega, española e internacional MAOTIK, Marta Verde & José Venditti, Estela Oliva & Ana Quiroga e MIL111. Cómpre sinalar que este emprendedor evento de arte e tecnoloxía en Galicia está impulsado pola Deputación da Coruña, coa curadoría de HITO, no marco do CEI Lab.
Indo a este sábado, 9 de maio, dicir que o (IN)VISUAL traerá unha nova experiencia a cargo da pioneira Marta Verde e o músico José Venditti. O ciclo de concertos audiovisuais inmersivos leva de novo esta fin de semana a mellor cultura dixital contemporánea á Cidade das TIC.
Habituais de espazos de referencia para a cultura contemporánea internacional como Medialab Prado, L.E.V., Casa Encendida ou o Museo Reina Sofía, o tándem artístico formado por Marta Verde & José Venditti presentarán no CEI da Coruña, este sábado, ás 20.30h, a súa obra Prima Materia, unha experiencia inmersiva e orgánica que xoga en directo cun saxofón sintetizado.
(IN)VISUAL continuará o sábado 16 de maio, ás 20.30h, da man de Estela Oliva & Ana Quiroga; mentres que o colectivo de orixe vigués MIL111 clausurará o ciclo o sábado 23 de maio, tamén ás 20 horas.
O concerto de Marta Verde & José Venditti pendurou xa o cartel de entradas esgotadas, mentres que os últimos tíckets para as dous experiencias restantes están dispoñíbeis en Ataquilla: o acceso é gratuíto, cun depósito de 5 euros para a súa reserva, que serán reembolsados de xeito automático na entrada ao recinto.
Achegándonos ao concerto deste sábado, Prima Materia, de Marta Verde & José Venditti, é a orixe da transmutación, a materia bruta antes da iluminación dourada. Na tradición alquímica, representa a substancia primixenia da que todo pode xurdir: o estado previo á conversión do chumbo en ouro, do caos en orde, da sombra en luz. Este novo proxecto de José Venditti e Marta Verde propón un live audiovisual que se adentra na crueza do son e na fisicidade da imaxe desde unha aproximación esencial e matérico-sensorial. Resonancias sonoras e visuais entrelázanse en tempo real, creando unha experiencia inmersiva e orgánica.
Marta Verde e José Venditti son un dúo de artistas que leva desenvolvendo performances audiovisuais desde 2015. No seu traballo exploran os límites da melodía e o ruído, harmonía e tensión, repetición e aleatoriedade, nun exercicio de equilibrio entre composición e libre improvisación. Os seus proxectos artísticos foron presentados en espazos e eventos tan sinalados como: o Museo Nacional Reina Sofía, o Festival In Sonora, LA Contemporary Dance Company, Performa NYC, L.E.V, o Festival Mira, o Centro Cultural Conde Duque, o Espacio Fundación Telefónica, La Casa Encendida, o Círculo de Bellas Artes, Medialab Prado, etc.
Para rematar, informar que o público poderá acudir á Cidade das TIC (lugar onde se van levar a cabo os concertos) polos seus propios medios ou facer uso do servizo de autobús que a organización do ciclo porá á súa disposición. Neste último caso, a recollida realizarase cada sábado na rúa Juan Flórez, nº 10, contra ás 19 horas. A apertura de portas está fixada ás 19.30 horas. Unha vez no recinto, antes do comezo do show, terá lugar una breve contextualización na Cidade das TIC. De 20 a 21.15 horas, desenvolverase a experiencia, en formato show & talk, cunha charla cos e coas artistas implicados e implicadas unha vez rematado o concerto. Ás 21.30 horas, o público que faga uso de autobús estará de volta en Juan Flórez, nº 10.

Marvel's Guardians of the Galaxy chega a Luna

Redacción — 2026-05-08T09:30:28Z

Amazon actualizou o catálogo de xogos incluídos en Luna para maio de 2026, incorporando novos títulos tanto ao servizo de xogo na nube accesible cos beneficios de Prime como á selección mensual de xogos descargables para PC. A plataforma continúa ofrecendo máis de 50 xogos rotatorios dentro da modalidade Luna Standard.
Entre as principais incorporacións deste mes destaca Marvel''s Guardians of the Galaxy, aventura de acción en terceira persoa protagonizada por Star-Lord e os Gardiáns da Galaxia, cunha historia orixinal ambientada no universo Marvel.
Tamén chega Resident Evil 2, a reinterpretación moderna do clásico de Capcom ambientado en Raccoon City durante o desastre biolóxico de 1998.
A selección de Luna Standard amplíase ademais con Alien: Isolation, La Tierra Media: Sombras de Guerra, LEGO Star Wars III: The Clone Wars e LEGO Star Wars: The Complete Saga.
Os membros de Prime tamén poden reclamar varios xogos para PC ao longo do mes mediante códigos para diferentes plataformas. O 7 de maio estarán dispoñibles Mafia II: Definitive Edition e Fruitbus en GOG. O 14 de maio sumaranse Survival: Fountain of Youth e 60 Minutes to Extinction: Escape Room, ademais de Lethal Honor: Order of the Apocalypse en Epic Games Store.
O 21 de maio chegarán Space Grunts, Palindrome Syndrome: Escape Room e Hot Brass, mentres que o 28 de maio pecharán a programación Nordic Storm Solitaire, Moon Mystery e Pro Basketball Manager 2026.

A ciberdelincuencia e os xeitos de combatela eficazmente centraron a xornada Ourensec

S. P. — 2026-05-08T09:11:39Z

Este xoves 7 de maio celebrouse en Ourense a xornada Ourensec. Do ciberdelito ao xuízo organizada pola Asociación de Ciberseguridade de Ourense, unha iniciativa centrada na análise do fenómeno da ciberdelincuencia desde unha perspectiva integral, abordando tanto a súa investigación como a súa resposta xudicial. No acto, celebrado na Facultade de Informática (UVigo), participaron destacados profesionais do ámbito xurídico, policial e tecnolóxico, configurando un programa que permitiu afondar nos principais retos que presenta a seguridade dixital na actualidade.
En concreto, a actividade reuniu especialistas do ámbito xurídico, policial e tecnolóxico para ofrecer unha análise práctica da ciberdelincuencia, a investigación dixital e a súa proxección no ámbito xudicial. Para facelo, contou coa participación de representantes de diferentes institucións, así como de membros das forzas e corpos de seguridade, operadores xurídicos e especialistas en ciberseguridade, configurándose como un espazo de intercambio de coñecementos e colaboración interinstitucional.
Ademais da ESEI, da UVigo colaboraron nesta iniciativa as facultades de Dereito e de Ciencias Empresariais e Turismo do Campus de Ourense.
O encontro arrancou ás 09.00 h coa participación de Gonzalo Pérez Jácome, alcalde de Ourense, e Eladio Santos, subdelegado do Goberno en Ourense, que destacaron a crecente importancia da ciberseguridade e da formación neste eido, e foi clausurado ás 19.00 h por Luis Menor, presidente da Deputación de Ourense, quen puxo en valor a relevancia desta xornada “nun momento no que a transformación dixital avanza a gran velocidade e esixe respostas coordinadas, rigor técnico e compromiso institucional”.
O presidente provincial destacou que “cando falamos de ciberdelito, falamos tamén de confianza, de garantir dereitos e de protexer ás persoas nun entorno cada vez máis complexo”.
Menor quixo achegar tamén a súa experiencia profesional previa como letrado da Administración de Xustiza, subliñando que “o Dereito sempre vai detrás da realidade, pero non pode permitirse chegar tarde”, incidindo na necesidade de adaptar os instrumentos xurídicos e institucionais aos novos desafíos que presenta a ciberdelincuencia.
Amais, o presidente da Deputación incidiu na dimensión provincial da ciberseguridade, lembrando que “non é unha cuestión que afecte só ás grandes cidades ou ás grandes empresas, senón tamén aos nosos concellos, ao tecido produtivo e á cidadanía en xeral”. Así, destacou a importancia de acompañar aos municipios, especialmente aos de menor tamaño, no proceso de transformación dixital, garantindo que conten cos recursos necesarios para facer fronte aos novos riscos asociados ao uso das tecnoloxías.
O presidente provincial concluíu sinalando que “a ciberseguridade non é unha opción, senón unha necesidade para garantir a confianza democrática, a seguridade xurídica e a cohesión social”, comprometendo o traballo da Deputación para que a provincia de Ourense “estea preparada, protexida e conectada co futuro” e citou iniciativas como a adhesión da Deputación ao Centro de Operacións de Ciberseguridade de Entidades Locais, o que afondou na prevención, protección, detección, resposta inmediata, xestión de crise e asesoramento ante calquera incidencia de ciberseguridade nos concellos da provincia.
Pola súa banda, Efrén Varón, presidente de Asociación de Ciberseguridade de Ourense (Ourensec), explicou que a súa asociación, entidade sen ánimo de lucro que quere devolver á sociedade o que a sociedade inverte en ciberseguridade, organizou esta xornada co obxectivo de “intentar concienciar á sociedade de que a ciberseguridade é importante”. Así, advertiu, “é un problema que veu para quedarse e que cada día medra máis. Neste senso apuntou datos como que no último ano a incidencia de problemas de ciberseguridade aumentou un 56% nas empresas, destacando sobre todo as estafas BEC (business email compromise - correo corporativo comprometido), no que as e os ciberdelincuentes modifican datos de correos electrónicos para conseguir o envíen diñeiro ou datos confidenciais. Para previr e intervir ante esta ameaza, apuntou que “consideramos que no eido da ciberseguridade é moi importante concienciar tanto a particulares como empresas e institucións para evitar fraudes, estafas e problemas de todo tipo”.
A xornada contou cun amplo panel de relatores e intervencións, como as de Miguel Ángel Ruiz, fiscal delegado de Cibercriminalidade Informática na Fiscalía Provincial de Ourense; Francisco Pérez, adxunto da Agencia Española de Protección de Datos; Fernando Mairata, CEO de DLTCode; Antonio Vázquez, sarxento 1º da Garda Civil en Ourense; José Manuel Araujo, inspector xefe do Corpo Nacional de Policía e xefe da Brigada Investigación de Delitos Tecnolóxicos; o hacker Antonio Fernandes; José A. Cascallana, director de Laboratorios de Ciberseguridad Industrial en InprOTech; Manuela Fernández, do Colexio da Avogacía (ICA) Ourense; e Diego Cid, CEO de CQe-Solutions. Nas súas conferencias e charlas abordaron, desde a súa experiencia nos diferentes postos que ocupan, os retos que afronta a ciberseguridade.

Google presenta a nova pulseira Fitbit Air

Redacción — 2026-05-07T21:00:00Z

Google anunciou o lanzamento de Fitbit Air, unha nova pulseira de actividade centrada na simplicidade, a comodidade e o prezo accesible, ao tempo que revelou a evolución de Fitbit Premium cara a Google Health Premium, un servizo que incorpora Google Health Coach, un asistente de saúde personalizado impulsado por Gemini.
A Google Fitbit Air preséntase como o dispositivo wearable máis pequeno desenvolvido ata o momento pola marca. O seu deseño prescinde de pantalla para reducir distraccións e aposta por unha experiencia centrada na monitorización pasiva da saúde e da actividade física.
O dispositivo integra sensores capaces de realizar seguimento continuo da frecuencia cardíaca, detectar posibles episodios de fibrilación auricular, medir saturación de osíxeno no sangue (SpO₂), variabilidade da frecuencia cardíaca, fases do sono e outros parámetros biométricos.
Google asegura que a pulseira foi deseñada para levar posta durante todo o día sen molestias, incluído o sono, cunha autonomía de ata unha semana e carga rápida capaz de proporcionar batería para un día completo en cinco minutos. Tamén será posible alternar o seu uso cun Pixel Watch sen perder datos de seguimento.
A monitorización da actividade física combinarase coa aplicación Google Health, que substitúe á antiga aplicación Fitbit. Desde ela poderanse iniciar adestramentos, recibir recomendacións guiadas e rexistrar automaticamente actividades frecuentes grazas a un sistema de detección que aprende dos hábitos do usuario. O sistema tamén permitirá empregar fotografías para interpretar rutinas de ximnasio ou equipos de exercicio.
Google acompañará o lanzamento cunha colección de correas intercambiables de distintos estilos. A Loop Performance será a opción estándar e estará fabricada con materiais reciclados, mentres que tamén haberá variantes deportivas de silicona e modelos orientados a un uso máis estético.
Fitbit Air poderá reservarse desde hoxe por 99,99 euros e chegará ás tendas o 26 de maio. O dispositivo incluirá tres meses de subscrición a Google Health Premium. As correas adicionais partirán de 44,99 euros.

Vídeo promocional da Google Fitbit Air

LEGO Batman: El legado del Caballero Oscuro estrea tráiler de lanzamento

Redacción — 2026-05-07T20:30:00Z

TT Games e Warner Bros. Games publicaron o tráiler de lanzamento de LEGO Batman: El legado del Caballero Oscuro, o novo videoxogo de acción e aventura en mundo aberto protagonizado polo heroe de Gotham, que chegará o vindeiro 22 de maio para PlayStation 5, Xbox Series X|S e PC, mentres que a versión para Nintendo Switch 2 estará dispoñible máis adiante.
A peza promocional aposta claramente pola nostalxia arredor do universo cinematográfico de Batman ao empregar unha reinterpretación cinematográfica de Kiss from a Rose, a coñecida canción de Seal asociada historicamente a Batman Forever. O tema acabou convertido nun dos maiores éxitos do artista despois de que o director Joel Schumacher decidise incluílo nos créditos do filme de 1995 e no videoclip promocional da película, malia que inicialmente non figuraba nas escenas principais.
O vídeo amosa secuencias de combate, persecucións e numerosos viláns clásicos do universo DC, ao tempo que deixa ver referencias visuais e argumentais a distintas etapas da historia audiovisual de Batman. Entre elas inclúense mesmo homenaxes a Batman & Robin (considerada unha das adaptacións máis cuestionadas do personaxe no cinema), así como ás entregas dirixidas por Tim Burton e por Christopher Nolan.
O xogo propón seguir a evolución de Bruce Wayne ata converterse no protector de Gotham City, mesturando elementos inspirados en décadas de filmes, series, cómics e videoxogos do Cabaleiro Escuro co humor característico das producións de LEGO desenvolvidas por TT Games.
Pese a estarmos ante un título que busca ser apto para todos os públicos, o seu sistema de combate lembra á serie de xogo Batman: Arkham, polo que poderiamos estar ante un xogo que satisfaga a un abano de público moi amplo, e non só aos seareiros dos xogos de LEGO.

Tráiler de lanzamento de LEGO Batman: El legado del Caballero Oscuro

Ábrese unha investigación xudicial contra Elon Musk en Francia

Redacción — 2026-05-07T20:00:00Z

A xustiza francesa elevou significativamente o ton contra Elon Musk ao abrir unha investigación xudicial en París polas posibles derivas de X, a rede social anteriormente coñecida como Twitter. Este movemento, que supón a designación dun xuíz de instrución para dirixir o caso, marca unha nova fase nas pescudas que comezaron inicialmente en xaneiro de 2025.
O obxectivo principal das autoridades é determinar se o empresario estadounidense e a directora xeral da plataforma, Linda Yaccarino, puideron incorrer en complicidade pola difusión de contidos ilícitos. Entre os cargos máis graves que se investigan figuran a distribución de imaxes de abuso sexual infantil e a creación de deepfakes de carácter sexual xerados sen o consentimento das vítimas a través das ferramentas de intelixencia artificial da propia rede.
O papel da tecnoloxía Grok, o modelo de linguaxe desenvolvido por xAI e integrado en X, tamén se atopa no centro da polémica. Diversas organizacións de dereitos humanos presentaron denuncias tras detectar que esta intelixencia artificial xeraba textos que minimizaban ou negaban feitos históricos relacionados co Holocausto. Esta situación levou aos investigadores a poñer o foco non só na moderación de contidos humanos, senón tamén na responsabilidade legal dos algoritmos que a empresa pon á disposición dos usuarios.
A apertura desta vía xudicial prodúcese despois de que Elon Musk ignorase unha citación para declarar o pasado 20 de abril. Lonxe de mostrar unha actitude colaborativa, o magnate utilizou a súa propia plataforma para atacar á fiscalía de París e aos maxistrados franceses, cualificándoos de monicreque de organizacións políticas e criticando duramente a soberanía xudicial do país.
Pola súa banda, representantes do goberno francés e deputados implicados no seguimento destas plataformas defenderon que a liberdade de expresión non pode ser un salvoconduto para ignorar as leis nacionais e europeas. Segundo as autoridades galas, se as plataformas tecnolóxicas desexan operar no seu territorio, deben cumprir coas normativas establecidas mediante procesos democráticos, baixo o risco de enfrontarse a sancións severas ou incluso ao bloqueo do servizo.
Este caso non é un feito illado en Francia, xa que o país tamén iniciou procedementos similares contra outras plataformas de gran impacto como Telegram, TikTok ou a rede de streaming Kick. O avance desta investigación contra Musk podería establecer un precedente crucial sobre como os estados nacionais poden esixir responsabilidades penais aos propietarios de xigantes tecnolóxicos pola xestión diaria das súas redes e o impacto social das súas ferramentas de intelixencia artificial.

Nova xeración de modelos de voz en tempo real de OpenAI

Redacción — 2026-05-07T20:00:00Z

OpenAI presentou hoxe a súa nova xeración de modelos de voz integrados na súa API. Esta actualización non se limita a mellorar a calidade do son, senón que introduce capacidades de razoamento de clase GPT-5 en interaccións de audio en tempo real, marcando un fito no camiño cara a asistentes dixitais máis humanos e eficaces.
A xoia da coroa desta nova oferta é o GPT-Realtime-2. Este modelo destaca pola súa capacidade para xestionar fluxos de traballo complexos mentres mantén unha conversa fluída. A diferenza das versións anteriores, este sistema pode razoar sobre a marcha, admitir interrupcións sen perder o fío e utilizar ferramentas de forma audíbel mentres o usuario segue falando. Para os desenvolvedores, isto tradúcese nunha maior flexibilidade, permitindo axustar o nivel de esforzo de razoamento entre cinco graos distintos para equilibrar a latencia e a precisión segundo a necesidade do servizo.
Xunto a este avance en razoamento, a compañía lanzou GPT-Realtime-Translate e GPT-Realtime-Whisper. O primeiro é un modelo de tradución en vivo capaz de procesar máis de 70 linguas de entrada e converter o discurso en trece linguas de saída sen apenas retardo. Pola súa banda, a nova versión de Whisper ofrece unha transcrición por streaming de baixa latencia, ideal para subtitulado en directo ou notas de reunións que se xeran ao mesmo ritmo que as palabras son pronunciadas.
A integración destas ferramentas xa está a dar os seus primeiros froitos en sectores como o inmobiliario ou o turístico. Empresas como Zillow ou Priceline están a utilizar estas capacidades para crear axentes de voz que poden axudar a un usuario a planificar unha viaxe ou buscar unha vivenda mediante comandos naturais e complexos. O incremento do contexto ata os 128K tokens permite que estas sesións sexan moito máis longas e coherentes, retendo información técnica e terminoloxía especializada que antes se perdía en conversas prolongadas.
En canto á seguridade e os custos, OpenAI implementou clasificadores activos para supervisar as sesións en tempo real e evitar usos que vulneren as súas políticas de contido. O modelo GPT-Realtime-2 ten un prezo de 32 dólares por cada millón de tokens de audio de entrada e 64 dólares por millón de saída. Pola súa parte, os servizos de tradución e transcrición prácense por minutos de uso, situándose en 0,034 e 0,017 dólares respectivamente. Con esta proposta, a tecnoloxía de voz deixa de ser un simple complemento para converterse nunha interface central onde a velocidade de resposta e a intelixencia profunda son, por fin, unha realidade.

Vídeo de presentación dos novos modelos de OpenAI

O CITEEC premiará os cómics que mellor visualicen as contribucións STEM das mulleres

S. P. — 2026-05-07T20:00:00Z

O Centro de Innovación Tecnolóxica en Edificación e Enxeñaría Civil (CITEEC) da Universidade da Coruña convoca a primeira edición do seu Concurso Escolar de Cómics, un certame destinado a alumnado de primaria e secundaria que busca dar visibilidade ao traballo da muller na enxeñaría.
O concurso, convocado con motivo do Día Internacional da Muller na Enxeñaría, pretende contribuír á redución da fenda de xénero nos ámbitos STEM (siglas en inglés de Ciencia, Tecnoloxía, Enxeñaría e Matemáticas), eliminando prexuízos e estereotipos, ademais de poñer en valor o papel do cómic como ferramenta de divulgación para todas as idades.
Neste contexto, as obras presentadas tratarán sobre a vida e o traballo das mulleres cuxa actividade laboral se encadre nalgún dos ámbitos STEM mencionados, independentemente do marco temporal (pasado, presente ou futuro).
Outorgarase un premio por cada modalidade (primaria e secundaria) que consistirá nunha visita guiada ao CITEEC para a persoa gañadora cun máximo de 25 acompañantes, un lote de regalos do centro, a impresión con formato póster do cómic gañador e a difusión da obra e autoría nas canles de comunicación do CITEEC.
O prazo estará aberto ata o 12 de xuño de 2026 para calquera estudante de primaria e secundaria dos centros escolares da Comunidade Autónoma de Galicia. A participación poderá ser individual ou en parella. Toda a información relativa a inscrición, características das obras e fallo do xurado está dispoñíbel na páxina w eb do CITEEC ou no código QR do cartel.

Os gañadores da Olimpíada Informática Galega 2026 foron recibidos polo conselleiro de Educación

S. P. — 2026-05-07T19:46:43Z

O Colexio Profesional de Enxeñaría en Informática de Galicia (CPEIG) e a Consellería de Educación e Ciencia celebraron esta tarde un encontro cos gañadores da Olimpíada Informática Galega (OIG) 2026, certame organizado polo CPEIG e as tres universidades galegas (a Universidade da Coruña, UDC; a Universidade de Santiago, USC; e a Universidade de Vigo, UVigo), que tivo lugar o pasado 7 de febreiro na Facultade de Informática da UDC.
A recepción, que se celebrou na sede da Consellería de Educación, contou coa asistencia do conselleiro de Educación, Román Rodríguez; o presidente do CPEIG, Fernando Suárez; o profesor da Facultade de Informática da UDC e director do certame OIG 2026, Diego Seco; e os gañadores da OIG, David Lago e Nicolás Freiría.
Rodríguez felicitounos polo excelente papel realizado en ambas olimpíadas e animounos a seguir esforzándose: “Sodes un exemplo para os vosos compañeiros e, ademais, estades a construír un futuro prometedor para vós mesmos”, destacou.
Pola súa banda, Fernando Suárez indicou que o CPEIG quere poñer en valor o enorme talento que existe en Galicia no ámbito da informática e as tecnoloxías dixitais, “con mozo que representan non só a excelencia académica, senón tamén a capacidade de esforzo, creatividade e innovación que necesitamos como sociedade”.
O presidente do Colexio engadiu que a Olimpíada Informática Galega, organizada conxuntamente coas tres universidades galegas, é unha mostra da importancia de detectar e acompañar o talento desde idades temperás. “Galicia ten capacidade para competir ao máximo nivel tecnolóxico e debemos seguir xerando oportunidades para que os nosos mozos desenvolvan aquí o seu futuro profesional. Galicia ten talento tecnolóxico de primeiro nivel, a nosa responsabilidade é detectalo, impulsalo e ofrecerlle oportunidades para crecer aquí. Apostar por estes estudantes é apostar polo futuro de Galicia”, asegurou.
Tamén Suárez destacou que “é fundamental impulsar vocacións STEM, especialmente en informática, porque é unha disciplina estratéxica para o desenvolvemento económico, a transformación dixital e a soberanía tecnolóxica”.
O gañador da olimpíada autonómica, David Lago Alonso, estudante de 2° Bacharelato no IES Pedro Floriani de Redondela, foi o terceiro clasificado da Olimpiada Informática Española, celebrada do 10 ao 12 de abril na Escola de Enxeñaría Informática da Universidade de Valladolid, coa participación de 42 estudantes de todo o país seleccionados entre os mellores talentos en programación. David Lago conseguiu unha medalla de ouro na clasificación, polo que será un dos representantes de España na competición internacional que terá lugar do 9 ao 16 agosto en Uzbequistán.
O segundo clasificado na OIG 2026 foi Nicolás Freiría, estudante de 2° Bacharelato do IES Ribeira de Louro do Porriño. Participou na Olimpiada Informática Española e estivo preto das medallas alcanzando o posto 19 da clasificación e recibindo unha mención.

O novo estabilizador para móbiles de DJI aposta polo control remoto

Redacción — 2026-05-07T19:30:00Z

DJI presentou o novo DJI Osmo Mobile 8P, un estabilizador para smartphones que incorpora novas funcións de encadre e seguimento orientadas á creación de vídeo profesional. O dispositivo aposta por melloras tanto no control remoto como na estabilización e na captura cinematográfica, ademais de integrar compatibilidade co sistema Apple DockKit para seguimento nativo en iPhone.
Entre as principais novidades figura Osmo FrameTap, un mando a distancia desmontable que permite realizar selfies coa cámara traseira do teléfono ou controlar tomas a distancia mantendo un encadre preciso. O accesorio incorpora unha pantalla que reproduce a vista do smartphone ou do módulo multifuncional 2 do estabilizador, ademais dun joystick para controlar o movemento e o zoom. Tamén permite axustar o brillo e a temperatura da luz de recheo en oito niveis. O sistema magnético facilita acoplalo ou retiralo rapidamente do mango do estabilizador.
O seguimento de obxectivos tamén evoluciona coa chegada de ActiveTrack 8.0, que promete maior axilidade para manter os suxeitos centrados incluso en espazos concorridos como concertos ou eventos deportivos. O novo módulo multifuncional 2 amplía ademais a capacidade de seguimento máis aló de persoas e mascotas, permitindo fixar elementos como vehículos ou monumentos. Os usuarios de iPhone poden optar igualmente polo seguimento nativo mediante Apple DockKit directamente desde a aplicación de cámara do sistema.
O DJI Osmo Mobile 8P emprega a oitava xeración da tecnoloxía de estabilización de DJI nun sistema de 3 eixes pensado para obter vídeo máis fluído e dinámico. O estabilizador pesa arredor de 386 gramos e integra tanto un trípode como un brazo extensible de 215 milímetros. DJI asegura unha autonomía de ata 10 horas e engade un porto USB-C capaz de funcionar tamén como cargador para o teléfono durante gravacións longas ou retransmisións en directo.
A aplicación DJI Mimo incorpora varios modos cinematográficos destinados a simplificar a creación de contido avanzado. Entre eles figuran DynamicZoom, para efectos de expansión e compresión visual; obturación lenta para capturar estelas de luz; Action Shot para manter o seguimento de obxectivos rápidos; e un modo panorámico 2.35:1 que grava directamente en formato cinematográfico sen necesidade de recortes posteriores.
Outra das características destacadas é a rotación horizontal infinita de 360 graos, que facilita capturas panorámicas continuas desde calquera ángulo. O estabilizador tamén permite realizar tomas a ras de chan inclinando o eixe de paneo cara adiante, favorecendo perspectivas á altura de nenos ou mascotas.
O Osmo Mobile 8P xa está dispoñible custando o paquete estándar 159 euros (incluíndo o estabilizador, a abrazadeira magnética para teléfonos, o Osmo FrameTap, cables USB-C e unha bolsa de transporte). O paquete de seguimento avanzado elévase ata os 189 euros ao engadir o módulo multifuncional 2. Finalmente, o paquete para creadores ten un prezo de 219 euros e suma accesorios da serie DJI Mic Mini para gravación de audio.

Vídeo de presentación do estabilizador DJI Osmo Mobile 8P

Martina Aneiros destaca en Ferrol o potencial da IA para impulsar a moda e a economía galega

Redacción — 2026-05-07T16:30:00Z

O Campus Industrial de Ferrol da Universidade da Coruña acolleu a cuarta edición de The future of fashion talent, unha xornada centrada nesta ocasión no impacto da intelixencia artificial na cadea de valor da moda e na transformación do emprego no sector.
O encontro, impulsado en colaboración con Modaes e Cointega, reuniu profesionais da industria, da formación e do ámbito tecnolóxico para analizar como a IA xa está a modificar procesos de deseño, produción, sustentabilidade, xestión e toma de decisións nas empresas de moda. A xornada tamén puxo o foco nas novas habilidades e perfís profesionais que demandará o sector nos vindeiros anos.
Entre os participantes figuraron representantes da propia universidade e de firmas como The Are, El Pulpo e Lady Pipa, que compartiron experiencias sobre a integración destas ferramentas tecnolóxicas nas súas actividades.
A clausura correu a cargo da delegada territorial da Xunta en Ferrol, Martina Aneiros, quen destacou o potencial da intelixencia artificial para impulsar sectores estratéxicos da economía galega. Aneiros puxo en valor «o Grao en Xestión Industrial da Moda, unha titulación pioneira» e subliñou a importancia de crear espazos de encontro entre o ámbito académico e o empresarial.
Durante a súa intervención tamén fixo referencia ao Programa galego de IA 2026-2028, co que a Xunta pretende favorecer o desenvolvemento e adopción desta tecnoloxía en Galicia, promovendo ao mesmo tempo unha transición dixital «sostible e ética».

Malestar polo feito de que Chrome descargue sen permito un modelo de IA

Redacción — 2026-05-07T15:30:00Z

: O polémico ficheiro levaría bastantes meses sendo descargado por Google Chrome sen avisar aos usuarios

O investigador de seguridade Alexander Hanff, coñecido como That Privacy Guy, asegura que Google Chrome está a descargar de maneira silenciosa un modelo de intelixencia artificial de preto de 4 GB nos equipos dos usuarios sen unha solicitude explícita de consentimento. O ficheiro, denominado weights.bin, correspondería aos pesos do modelo Gemini Nano, empregado por Google para executar funcións de IA localmente no navegador.
Segundo a análise publicada por Hanff, o ficheiro instálase no directorio interno OptGuideOnDeviceModel cando Chrome detecta que o equipo cumpre determinados requisitos de hardware, como dispoñer de polo menos 16 GB de memoria RAM ou máis de 4 GB de VRAM. O investigador sostén que o proceso se realiza en segundo plano e sen mostrar avisos claros ao usuario sobre o tamaño da descarga ou o espazo que ocupará no disco.
Hanff afirma ter verificado o comportamento nun perfil novo de Chrome en macOS mediante os rexistros do sistema de ficheiros de Apple, que documentan a creación do directorio e a descarga do modelo durante unha sesión sen interacción humana. Segundo os seus datos, o proceso completo prolongouse durante uns catorce minutos. Tamén indica que Chrome analiza previamente as características do hardware para decidir se o dispositivo é apto para recibir o modelo.
O investigador considera que esta práctica podería vulnerar a normativa europea, citando a Directiva ePrivacy e diferentes disposicións do RGPD relacionadas coa transparencia, o consentimento e a minimización de datos. Tamén critica que o navegador volva descargar automaticamente o modelo se o usuario elimina manualmente o ficheiro, salvo que desactive determinadas opcións experimentais ou funcións de IA do navegador.
Google respondeu posteriormente ás críticas nun comunicado remitido a Android Authority. A compañía de Mountain View asegura que Gemini Nano leva dispoñible en Chrome desde 2024 e que o modelo serve para ofrecer funcións de seguridade e ferramentas de IA sen enviar información á nube. Google tamén sostén que o modelo pode eliminarse automaticamente se o equipo queda sen recursos suficientes e que desde febreiro incorporou unha opción na configuración de Chrome para desactivar e borrar o modelo descargado.
Android Authority subliña que o ficheiro non é spyware nin un malware, senón un modelo local pensado precisamente para mellorar a privacidade ao procesar certas funcións directamente no dispositivo. O medio recoñece, porén, que a ausencia de avisos claros e a descarga automática de varios gigabytes sen intervención do usuario explican o malestar xerado entre moitos usuarios, especialmente en equipos con pouco espazo de almacenamento ou conexións limitadas.

A Lei de IA europea prohibirá a creación de espidos con IA

Redacción — 2026-05-07T15:00:00Z

A Comisión Europea celebrou o acordo político acadado entre o Parlamento Europeo e o Consello da UE para introducir regras máis simples e favorables á innovación no ámbito da intelixencia artificial. A reforma modifica a aplicación da Lei de IA europea co obxectivo de facilitar o cumprimento normativo ás empresas sen reducir as garantías en materia de seguridade, dereitos fundamentais e protección cidadá.
A iniciativa forma parte do chamado Omnibus Dixitl sobre IA, presentado pola Comisión hai cinco meses dentro da súa estratexia de simplificación regulatoria para reforzar a competitividade europea. O acordo fixa un calendario gradual para a entrada en vigor das obrigas aplicables aos sistemas de IA de alto risco.
Os sistemas empregados en ámbitos especialmente sensibles, como biometría, infraestruturas críticas, educación, emprego, migración, asilo ou control fronteirizo, quedarán sometidos ás novas regras a partir do 2 de decembro de 2027. Os sistemas integrados en produtos como ascensores ou xoguetes deberán cumprir os requisitos desde o 2 de agosto de 2028. Bruxelas defende esta aplicación escalonada para garantir que existan estándares técnicos e ferramentas de apoio antes da plena entrada en vigor das normas.
O acordo endurece tamén a protección fronte a determinados usos abusivos da IA. A nova redacción prohibe os sistemas capaces de xerar contido sexual explícito ou íntimo sen consentimento, así como material de abuso sexual infantil. A medida apunta directamente ás chamadas aplicacións de nudificación, que empregan IA para crear imaxes falsas de persoas espidas a partir de fotografías reais.
As empresas beneficiaranse de procedementos simplificados e dunha gobernanza máis clara. Determinadas vantaxes previstas para pequenas e medianas empresas amplíanse agora ás compañías de mediana capitalización reducida. Tamén se clarifica a relación entre a Lei de IA e outras normas europeas de seguridade de produtos, especialmente o Regulamento de Maquinaria, para evitar duplicidades regulatorias.
O novo marco incrementará ademais o acceso aos chamados sandboxes regulatorios, contornos de probas supervisadas nas que as compañías poden experimentar con solucións de IA en condicións reais. Prevese incluso a creación dun sandbox a escala europea. Paralelamente, reforzaranse as competencias da Oficina Europea de IA para supervisar determinados sistemas, incluídos os modelos de propósito xeral e os integrados en plataformas en liña e motores de busca de gran tamaño.
A vicepresidenta executiva para Soberanía Tecnolóxica, Seguridade e Democracia, Henna Virkkunen, asegurou que «as empresas e os cidadáns queren dúas cousas das regras sobre IA: poder innovar e sentirse seguros». Engadiu que o acordo permite «facilitar a innovación sen rebaixar as esixencias de seguridade» e garantir que as ferramentas de apoio ás empresas estean preparadas para unha aplicación fluída da Lei de IA.
O texto deberá ser adoptado formalmente polo Parlamento Europeo e polo Consello antes da súa publicación no Diario Oficial da Unión Europea. A entrada en vigor producirase tres días despois desa publicación.

AMTEGA achega máis de 40 servizos TIC de balde aos concellos para impulsar a súa transformación

S. P. — 2026-05-07T14:30:00Z


Damián Rey, director de AMTEGA

O director da Axencia para a Modernización Tecnolóxica de Galicia (AMTEGA), Damián Rey, destacou este 7 de maio na súa comparecencia ante a Comisión 3ª do Parlamento de Galicia que a Xunta pon á disposición das entidades locais e das deputacións provinciais un catálogo de servizos dixitais que supera o medio cento de solucións, das que máis de 40 se prestan de maneira totalmente gratuíta aos concellos.
Segundo explicou, este catálogo constitúe “un instrumento clave para impulsar a transformación dixital das administracións locais e garantir a igualdade de dereitos en todo o territorio”, permitindo que todos os concellos, con independencia do seu tamaño ou recursos, accedan a ferramentas tecnolóxicas avanzadas sen custo.
Rey subliñou que “este modelo evita que as entidades locais teñan que asumir investimentos en sistemas complexos e favorece unha xestión máis eficiente”.
O director da Axencia puxo en valor que esta iniciativa é froito dunha colaboración institucional consolidada desde 2010 a través dun convenio coa Federación Galega de Municipios e Provincias (FEGAMP), baixo a premisa de “non deixar a ninguén atrás”.
O catálogo abrangue servizos en ámbitos como a administración dixital, a xestión do territorio, a ciberseguridade e capacitación cidadá.
No ámbito da administración dixital, o máximo responsábel da axencia autonómica destacou que “hoxe todos os concellos e as catro deputacións están integrados na Rede Corporativa da Xunta, que lles proporciona conectividade segura de alta capacidade con servizos de datos, internet e telefonía”.
Ademais, engadiu que 316 entidades están conectadas á rede SARA, “o que facilita a súa interconexión co resto das administracións públicas”.
A maiores, un total de 259 entidades empregan a Plataforma de Contratos Públicos de Galicia, mentres que 125 utilizan o sistema de licitación electrónica SiLEX. Tamén 127 entidades fan uso da plataforma de intermediación pasaXe! para o intercambio de información administrativa.
En materia de identidade dixital, fixo saber que 284 entidades dispoñen de servizos de certificación con máis de 1.000 certificados en vigor, e no ámbito das relacións coa cidadanía, 77 concellos utilizan o sistema de notificación electrónica Notifica.gal, mentres que 114 empregan o Rexistro das policías locais.
No ámbito da ciberseguridade, Rey destacou que “a Xunta ofrece ás entidades locais un ferramentas avanzadas, apoio técnico continuo e formación, coordinado por unha Oficina Técnica de Seguridade”.
Engadiu que grazas a esta colaboración, en 2025 xeráronse máis de 4.000 alertas e xestionáronse arredor de 9.000 incidentes e formouse a máis de 1.000 empregados públicos formados nesta materia.
No eido do territorio, o director da AMTEGA destacou ferramentas como a Rede Galega de Emerxencias, con máis de 1.000 usuarios en 125 concellos, así como o visor de franxas secundarias (Xesbio2), o Rexistro de Informes de Avaliación de Edificios (REGIAE) ou o rexistro de licenzas de taxi.
Damián Rey salientou igualmente o papel da Rede de Aulas CeMIT como “instrumento clave de capacitación dixital da cidadanía, con 93 centros en 90 concellos e máis de 130.000 persoas usuarias”.
O director da AMTEGA rematou a súa intervención facendo fincapé en que a transformación dixital das entidades locais “é un proxecto de país” baseado na igualdade, na cohesión e na colaboración institucional, e destacou que Galicia conta cun modelo consolidado que seguirá evolucionando para dar resposta aos novos retos tecnolóxicos.

Chegan a España os novos reloxos de Huawei

Redacción — 2026-05-07T14:00:00Z

Huawei presentou oficialmente en España a súa nova xeración de reloxos conectados, os Huawei Watch Fit 5 e Watch Fit 5 Pro, liña que destaca por un incremento notable no brillo das pantallas e unha autonomía que promete dar resposta ás necesidades dos usuarios máis esixentes sen sacrificar o deseño.
O modelo estándar integra unha pantalla AMOLED de 1,82 polgadas, mentres que a versión Pro eleva a aposta cun panel de 1,92 polgadas, o máis grande da familia Fit ata o momento. Un dos avances máis significativos reside na visibilidade en exteriores: o modelo Pro alcanza os 3.000 nits de brillo máximo, o que garante unha lectura nítida baixo a luz solar directa. No apartado estético, a versión avanzada destaca polo uso dun cristal de zafiro curvo e un bisel de titanio, materiais que achegan unha resistencia superior contra as rabuñaduras e os golpes.
No tocante á saúde e ao rendemento deportivo, a serie estrea o sistema TruSense para unha monitorización máis eficiente. O modelo Pro inclúe a capacidade de realizar electrocardiogramas e analizar a rixidez arterial, sumándose ás habituais medicións de osíxeno en sangue e frecuencia cardíaca. Unha das novidades é a integración de Han-Han, un personaxe interactivo que guía o usuario e reacciona segundo o seu estado emocional, detectando ata doce estados diferentes para fomentar o benestar mental.
A autonomía segue a ser un dos piares de Huawei. Os reloxos contan cunha batería de 471 mAh que ofrece ata dez días de uso lixeiro ou unha semana en condicións normais. Ademais, o Watch Fit 5 Pro introduce por primeira vez baterías empilladas con ánodo de silicio, unha tecnoloxía que optimiza o consumo enerxético. Para os deportistas, o sistema de posicionamento Sunflower asegura unha xeolocalización precisa en calquera contorna.
Os prezos de saída sitúanse nos 199 euros para o modelo Watch Fit 5 e 299 euros para a versión Pro. Co obxectivo de incentivar as vendas iniciais, a marca chinesa ofrece descontos (de 40/50 euros) e accesorios adicionais a través da súa tenda oficial ata o vindeiro 21 de xuño. Ambos modelos manteñen a total compatibilidade con Android e iOS.

: O Huawei Watch Fit 5 chega con correas en numerosas cores

Qualcomm presenta dúas novas plataformas Snapdragon para democratizar funcións avanzadas

Redacción — 2026-05-07T12:00:00Z

Qualcomm presentou os novos Snapdragon 6 Gen 5 e Snapdragon 4 Gen 5, plataformas móbiles orientadas a ampliar o acceso a funcións avanzadas en teléfonos de gama media e de entrada. Os novos chips chegarán a dispositivos comerciais durante a segunda metade de 2026 da man de fabricantes como Honor, Oppo, realme e Redmi.
Os dous procesadores introducen Snapdragon Smooth Motion UI, unha tecnoloxía destinada a mellorar a fluidez da interface e reducir os atrasos nas interaccións do sistema. Snapdragon 6 Gen 5 promete lanzamentos de aplicacións un 20 % máis rápidos e unha redución do 18 % nas interrupcións da pantalla, mentres que Snapdragon 4 Gen 5 incrementa a velocidade de apertura de aplicacións nun 43 % e reduce os tiróns da interface nun 25 %.
Snapdragon 6 Gen 5 céntrase en achegar capacidades máis avanzadas a dispositivos accesibles, incluíndo novas funcións fotográficas impulsadas por IA, melloras para xogos e conectividade 5G e Wi-Fi 7. Qualcomm asegura tamén unha mellora do 21 % no rendemento gráfico, acompañada dunha maior eficiencia enerxética. A plataforma incorpora Qualcomm Adaptive Performance Engine 4.0 para manter unha experiencia de xogo máis estable e prolongada.
Snapdragon 4 Gen 5 busca elevar as prestacións da serie máis básica da marca, cun incremento de até o 77 % no rendemento gráfico e compatibilidade con xogos a 90 fotogramas por segundo por primeira vez na familia Snapdragon 4. O chip tamén incorpora soporte para Dual SIM Dual Active con combinacións 5G + 5G/4G, permitindo manter conexión simultánea en varias redes.
Chenwei Yan, vicepresidente sénior de xestión de produto de Qualcomm Technologies, explicou que estes lanzamentos buscan ofrecer «experiencias atractivas impulsadas por un rendemento sólido e unha batería fiable», mantendo un equilibrio entre potencia, eficiencia e conectividade.
Desde Xiaomi, Jun Li destacou que a colaboración con Qualcomm permitirá levar innovación a máis segmentos do mercado, mellorando a fluidez, a eficiencia enerxética e a conectividade dos futuros smartphones da marca.

A aplicación Autofirma podería corromper o chaveiro de macOS

Marcus Fernández — 2026-05-07T11:40:00Z

Os usuarios de ordenadores de Apple nunca tiveron doado relacionarse coas Administracións públicas dende os seus equipos, pero nos últimos días o escenario tornou aínda máis escuro, xa que nun momento no que os cidadáns están tendo que recorrer á aplicación Autofirma para as declaracións de impostos, produciuse un incidente que podemos considerar bastante grave.
O caso máis visible foi o do podcasteiro Emilio Cano Emilcar, que narrou onte a corrupción do seu chaveiro de macOS, facendo que o seu equipo perdese todos os contrasinais almacenados no que describe como «unha desas pequenas historias de terror informático que comezan cun trámite administrativo e rematan cun mirando ao Mac como se viñese de traizoarte». Pero non parece que esteamos ante un caso puntuais, e outros usuarios correron a confirmar que lles pasara exactamente o mesmo.
Ao parecer, a aplicación Autofirma 1.9 en macOS corrompo o chaveiro de inicio de sesión cando menos en macOS 26.4.1, o que non deixa de ser un detalle máis para ilustrar o desleixo da Axencia Estatal de Administración Dixital, que permite que a aplicación de Autorima para Mac estea obsoleta e non respecta os estándares modernos de empaquetado e distribución de software, polo que durante a súa instalación compórtase como unha aplicación maliciosa, algo totalmente inadmisible para unha aplicación de uso obrigado para numerosos trámites administrativos.

Samsung asegura poder anticipar desmaios co Galaxy Watch6 ata cinco minutos antes

Redacción — 2026-05-07T11:20:00Z

Samsung anunciou os resultados dun estudo clínico desenvolvido xunto ao Hospital Universitario Chung-Ang de Gwangmyeong (Corea do Sur) no que se valida a capacidade do Galaxy Watch6 para predicir episodios de síncope vasovagal (VVS) cun elevado nivel de precisión mediante sinais biométricos captados polo reloxo intelixente.
A síncope vasovagal prodúcese cando a frecuencia cardíaca e a presión arterial descenden bruscamente debido a factores como o estrés intenso, provocando unha perda temporal de consciencia. Aínda que normalmente non representa un risco vital directo, as caídas asociadas poden derivar en lesións graves como fracturas ou conmocións cerebrais.
O estudo, liderado polo profesor Junhwan Cho do departamento de Cardioloxía do centro médico coreano, avaliou 132 pacientes con sospeita de sufrir este tipo de episodios durante probas clínicas inducidas de desmaio. Para iso empregouse un Galaxy Watch equipado cun sensor PPG (fotopletismografía), analizando datos de variabilidade da frecuencia cardíaca (HRV) mediante un algoritmo de intelixencia artificial.
Segundo os resultados publicados, o modelo foi capaz de anticipar episodios de síncope ata cinco minutos antes de que se producisen cunha precisión do 84,6 %. O sistema acadou unha sensibilidade clínica do 90 % e unha especificidade do 64 %.
Cho salientou que ata o 40 % da poboación experimenta algún episodio de síncope vasovagal ao longo da súa vida, mentres que un terzo dos afectados sofre recorrencias. O investigador considera que un sistema de aviso temperán permitiría aos pacientes adoptar unha posición segura ou solicitar axuda antes de perder o coñecemento, reducindo así o risco de lesións secundarias.
Samsung interpreta estes resultados como unha mostra do potencial dos dispositivos vestibles para avanzar cara a modelos sanitarios centrados na prevención e non só no tratamento posterior. Jongmin Choi, responsable do grupo de I+D en saúde da división Mobile eXperience da compañía, asegurou que seguirán ampliando as capacidades de monitorización dos seus wearables e reforzando a colaboración con institucións médicas.
Os achados foron publicados no volume 7, número 4, da revista científica European Heart Journal – Digital Health. Samsung asegura que se trata do primeiro estudo que demostra o potencial dun reloxo intelixente comercial para anticipar episodios de síncope mediante monitorización continua.

O tecido empresarial e hostaleiro de Ames estará xeolocalizado nunha guía

S. P. — 2026-05-07T11:00:00Z

O Concello de Ames, a través do departamento de Promoción Económica e Emprego, presentou a Guía de Empresas de Ames, un proxecto que busca conectar á veciñanza co comercio de proximidade e co tecido empresarial e que se presenta baixo o lema Tes que estar! O obxectivo do Concello é atraer a empresarios e usuarios e usuarias a unha aplicación web que funcionará como unha base de datos de todas as empresas que conforman o tecido comercial e hostaleiro de Ames.
A plataforma está na fase de probas, polo que durante o próximo mes, todas as empresas da municipio (do Milladoiro, Bertamiráns e do rural) que queiran participar deberán poñerse en contacto mediante o enderezo de correo electrónico guiaempresasames@gmail.com ou no número de teléfono 626 98 71 72 en horario de 09.00 a 15.00 horas.
A día de hoxe a base dispón de arredor de 1.150 empresas rexistradas. Todas aquelas que non o estean, ou que si formen parte pero queiran actualizar algún dato de relevancia, poderán comunicalo ao equipo de desenvolvemento do aplicativo durante as vindeiras semanas.
Neste acto de presentación, estiveron presentes a concelleira de Promoción Económica e Emprego, Ana Belén Paz; o técnico de Promoción Económica, Pablo Bello; e a deseñadora gráfica do proxecto, e responsábel de mercadotecnia e publicidade, María Jesús Balseiro. Cada un deles, puido desenvolver o funcionamento do aplicativo e as implicacións positivas deste na economía de proximidade.
A concelleira de Promoción Económica, Ana Belén Paz, comezou dicindo “en Ames témolo todo e queremos que todos os establecementos comerciais e hostaleiros e as empresas estean xeolocalizados nunha única aplicación. O obxectivo é que a veciñanza poida localizar aquel servizo que necesita dunha maneira áxil e sinxela. Xa realizamos un traballo de campo previo por Bertamiráns, O Milladoiro e polo rural para localizar as empresas existentes, pero agora abrimos un prazo dun mes para que as empresas poidan revisar os seus datos por se hai que modificar algún dato erróneo. Tamén solicitamos que aquelas empresas que non estean incluídas en dita aplicación, por estar situadas en pisos ou en casas particulares que non contan coa placas de identificación, se poñan en contacto con nós. Ademais, as empresas que comecen a súa actividade tamén deberán comunicalo para estar incluídas nesta aplicación”.
Pola súa parte, o técnico municipal de Promoción Económica, Pablo Bello, sinalou o interese polo desenvolvemento desta plataforma por parte do departamento, dende o cal levan tempo “querendo actualizar a base de datos de empresas. Era un traballo moi necesario para ter accesibilidade a calquera negocio que se queira dar de alta e estar facilmente localizábel”.
Este proxecto nace co obxectivo de “conectar á veciñanza co comercio e hostalería local amesán e axudar a localizar os diferentes establecementos de todo o municipio”. A través dun traballo de campo, a Administración local recompilou información dun gran número de empresas locais, co fin de xeolocalizalas e ofrecer á veciñanza un servizo de accesibilidade ao comercio local.
Deste xeito, e mediante unha aplicación web de localización espacial baseada nas ferramentas ofrecidas por Google Maps, empresas e usuarios poderán beneficiarse do seu funcionamento. En primeiro lugar, e baixo o lema Tes que estar!, interpélase ás empresas do municipio que aínda non formen parte da base para que acheguen información relevante sobre o seu negocio durante este mes de proba.
Poderán facelo a través do enderezo de correo electrónico guiaempresasames@gmail.com, o número de teléfono 626 98 71 72, ou ben mediante as chamadas que dende o equipo de desenvolvemento da aplicación se irán realizando durante as vindeiras semanas, co obxectivo de obter a máxima información sobre os comercios que conforman o tecido empresarial local.

Kreios Space mostrará no Industry Day (CITMAga) como crear satélites propulsados con partículas atmosféricas

S. P. — 2026-05-07T10:45:00Z

O CITMAga (Centro de Investigación e Tecnoloxía Matemática de Galicia), impulsado polas tres universidades galegas, e con sede no Campus Vida da Universidade de Santiago, organiza este 22 de maio o XV Foro de Interacción Matemática Industria (Industry Day) na Facultade de Matemáticas da USC. Neste importante encontro, no que investigadores matemáticos e representantes de empresas nacionais e internacionais amosarán como as matemáticas están a resolver problemas actuais que afectan á industria, participará a empresa Kreios Space, con sede en Nigrán, especializada no desenvolvemento de tecnoloxías para habilitar a operación sostida de satélites en órbitas terrestres moi baixas (VLEO).
Estes satélites están deseñados para operar de forma sostida arredor da Terra durante máis de cinco anos, permitindo prestacións sen precedentes en relación á observación do noso planeta e tamén no eido das telecomunicacións.
A súa principal innovación reside en que poden funcionar a altitudes de entre 150 e 300 quilómetros, unha contorna ata agora practicamente inaccesíbel debido ao forte arrastre atmosférico, que provoca a perda progresiva de altitude dos satélites.
Lembran dende CITMAga que outro fito clave da compañía é o desenvolvemento dun sistema de propulsión sostíbel e único no mundo. “Para xerar o empuxe, en lugar de empregar combustíbel convencional utilizamos as partículas da propia atmosfera”, explica o director de proxectos, Yago Recarey. Esta tecnoloxía, coñecida como propulsión eléctrica de respiración atmosférica (ABEP), permite eliminar a necesidade de levar combustíbel a bordo, incrementando de forma significativa a eficiencia e permitindo compensar de maneira continua o arrastre atmosférico, o principal reto destas órbitas. Segundo sinala a empresa, na actualidade non existe ningunha solución equivalente no mercado, e prevén demostrar esta tecnoloxía en órbita no último cuadrimestre de 2027.
En relación con este fito, Kreios Space está a desenvolver un proxecto en colaboración co CITMAga, centrado na optimización do deseño aerodinámico dos seus satélites. Tal como explica Yago Recarey, “as matemáticas son fundamentais no noso traballo, especialmente nas primeiras fases de deseño, onde empregamos funcións obxectivo para optimizar o rendemento dos sistemas”. Estas funcións permiten, por exemplo, maximizar a cantidade de partículas atmosféricas que o satélite é capaz de captar para utilizalas como combustíbel, e minimizar a resistencia xerada pola propia plataforma satelital.
O experto sinala que “un dos principais retos tecnolóxicos é atopar o equilibrio entre reducir o arrastre aerodinámico e maximizar a captación de partículas, un problema complexo e altamente non lineal”. Para resolvelo, a empresa combina algoritmos avanzados, intelixencia artificial e computación de altas prestacións, o que permite explorar miles de deseños posíbeis e identificar as configuracións máis eficientes.
“Ademais, unha vez en órbita, é clave que o satélite estea correctamente aliñado co fluxo de partículas atmosféricas. Por iso, o deseño da súa forma resulta determinante, xa que condiciona directamente a capacidade de captación e, en consecuencia, o rendemento do sistema de propulsión”, explica o director de proxectos da compañía.

O CITIC participará no Día da Ciencia na Rúa cun amplo programa de actividades divulgativas científicas

S. P. — 2026-05-07T10:30:00Z

Un ano máis o CITIC da UDC participará no Día da Ciencia na Rúa, un encontro anual que se celebra de xeito especial na cidade da Coruña onde escolares e científicos achegan a ciencia á cidadanía con experimentos e demostracións.
Nesta edición 2026 o Día da Ciencia na Rúa levarase a cabo o 9 de maio nos Xardíns de Méndez Núñez en A Coruña, con actividades de divulgación e innovación. Esta cita, posta en marcha en 1996 pola Asociación de Amigos de los Museos e organizada na actualidade polos Museos Científicos de A Coruña coa colaboración do Concello da Coruña, consolídase como un dos eixos máis salientábeis da divulgación científica en Galicia,
Indo ao espazo que ocupará o CITIC este día, dicir que contará coa súa propia xaima, na que desenvolverá ao longo da xornada un completo programa de actividades.
A partir das 11 horas realizaranse tres obradoiros. O primeiro será: Robótica intelixente e cognitiva, impartido por Martín Naya xunto con José Antonio Leis, Francisco Bellas e Jakub Müller. A continuación, David Otero presentará a actividade: IA contra o odio, coa participación de Paloma Piot, Eliseo Bao, Anxo Pérez e Javier Parapar. Por último, as investigadoras Laura Morán, María Merelas Ares e Xosé Manuel García García levarán a cabo o obradoiro: Algoritmos verdes.
Entre as 13 e as 15 horas desenvolveranse novas actividades. Ás 13 horas intervirán en CUAC FM Paloma Piot, Xabier Pérez e Irene Brage. De seguido presentarase a proposta: O meu mapa das cancións que lembro, de Hilda Romero. Despois terá lugar a presentación dos retos do proxecto Talentos Inclusivos, a cargo de Irene Brage xunto co alumnado do IES Ramón Menéndez Pidal de Zalaeta, un dos centros educativos que participan na actual edición do programa. A continuación, Xabier Pérez, xunto cos investigadores Clara Valle, Andrija Zupic, Ángel Regueiro e Mateo Fernández, dirixirá unha actividade centrada na observación solar e no recoñecemento de manchas solares mediante intelixencia artificial, así como na exploración da galaxia a través do telescopio espacial Gaia e da realidade virtual.
Xa pola tarde, entre as 15:30 e as 19 horas, Adriana Dapena desenvolverá a actividade Indución, circuítos e TIC para o desenvolvemento de proxectos, xunto con Óscar Fresnedo, Paula Castro e Liz Gámez. Ao mesmo tempo, entre as 16 e as 19 horas, terá lugar a proposta Intelixencia artificial para mellorar a saúde da muller: aplicación en incontinencia urinaria, a cargo de Javier Pereira xunto con Jorge Rivadulla, Freddy Pérez e Isabel Tuñas, na que se amosará como as tecnoloxías baseadas en intelixencia artificial poden aplicarse no eido sanitario para mellorar a calidade de vida.
O Día da Ciencia na Rúa ten como obxectivo achegar a ciencia á cidadanía, especialmente á xente máis nova, mediante propostas participativas nas que a aprendizaxe se transforma nunha experiencia lúdica e accesíbel que favorece o contacto directo co coñecemento científico nun espazo aberto.

Barlovento Comunicación ficha á galega Elena Neira

Marcus Fernández — 2026-05-07T10:01:17Z

A consulta audiovisual Barlovento Comunicación anunciou a incorporación da profesoras e investigadora Elena Neira como consultora especializada para impulsar os servizos profesionais da compañía arredor dos novos modelos de negocio audiovisuais e dos sistemas de distribución nun escenario marcado pola transformación tecnolóxica e a competencia entre plataformas.
A experta participará en distintos traballos de consultoría dixital e, ademais, asinará cada xoves a Carta semanal del streaming, unha nova publicación periódica dirixida aos subscritores da compañía centrada na evolución do mercado audiovisual.
Elena Neira é licenciada en Comunicación Audiovisual e en Dereito, doutora en Humanidades e Comunicación e profesora dos Estudos de Comunicación da UOC, ademais de impartir Distribución Audiovisual na UIC. A súa actividade investigadora céntrase en ámbitos como o streaming, as audiencias e o impacto da intelixencia artificial na industria audiovisual, dentro do grupo GAME.
Ao longo da súa traxectoria colaborou con numerosas empresas do sector audiovisual e publicou obras como El espectador social, La otra pantalla e Streaming Wars: la nueva televisión. Tamén é coautora de La revolución over the top. Del video bajo demanda (VoD) a la televisión por Internet e colaboradora habitual en distintas publicacións especializadas.
Neira destacou que inicia esta colaboración «con enorme ilusión e agradecemento a Barlovento Comunicación pola confianza depositada en min nun momento especialmente apaixonante e transformador para o sector». A investigadora considera que o ecosistema audiovisual atravesa «unha etapa de profunda evolución», marcada pola consolidación dos novos modelos de negocio, a redefinición das xanelas de distribución, a competencia global entre plataformas e o impacto da tecnoloxía e da intelixencia artificial nos hábitos de consumo e nas dinámicas da industria.
Tamén subliñou a importancia de contar cunha análise rigorosa e capacidade de anticipación nun mercado en constante cambio, e asegurou estar convencida de que esta nova etapa permitirá desenvolver «proxectos de gran valor» e contribuír ao debate sobre o presente e o futuro do audiovisual.

Rinoceronte Editora e TICGAL lanzan Rinodicionarios en formato de aplicación móbil

S. P. — 2026-05-07T09:01:46Z

A confluencia entre tecnoloxía e lingua galega deu un novo paso adiante neste arrinque de maio. Fíxoo co lanzamento de Rinodicionarios, un innovador multidicionario dixital en formato de aplicación móbil (para Android e para iOS) que viu a luz grazas á colaboración do selo de Cangas, Rinoceronte Editora, e a entidade TICGAL.
Segundo explican, Rinodicionarios traslada ao entorno móbil a experiencia xa consolidada na súa versión web, “permitindo agora acceder de forma cómoda e inmediata desde calquera lugar: desde raíces latinas ata termos modernos, este é o conxunto de ferramentas esencial para calquera que aprenda, escriba ou traballe en galego”.
O proxecto incorpora máis de 27.000 entradas, 17.000 locucións e 2.500 topónimos, resultado de anos de traballo especializado no ámbito lingüístico por parte de Rinoceronte Editora, o que consolida esta proposta, sinalan as dúas entidades, “como unha das iniciativas máis completas na súa categoría”.
Rinodicionarios reúne nunha única interface sinxela e intuitiva catro dicionarios (español-galego, latín-galego, etimolóxico e complementario) entre os que o usuario pode alternar cun só toque.
A aplicación está dispoñíbel en catro linguas de interface (galego, castelán, inglés e latín) ampliando así a súa accesibilidade e adaptándose a diferentes perfís de usuario.
Ademais, a aplicación incorpora funcionalidades deseñadas para mellorar a experiencia do usuario, como acceso rápido ás buscas recentes e a posibilidade gardar termos favoritos organizados por dicionario. Inclúe tamén unha sección coa palabra do día, que contribúe a enriquecer o vocubalario e fomentar o uso activo do galego.
Melloras técnicas: modo escuro e seguimento cero
No plano técnico, Rinodicionarios aposta tamén por unha experiencia de usuario optimizada, incorporando modo escuro para reducir o consumo enerxético e mellorar a visualización. Integra tamén un enfoque centrado na privacidade, no que non se realiza ningún seguimento dos datos de uso, garantindo unha experiencia totalmente anónima.
De balde
Outro dos aspectos diferenciais do proxecto é o seu carácter aberto e accesíbel, xa que a aplicación é completamente libre, sen funcionalidades de pago nin barreiras de acceso, reforzando o seu obxectivo de democratizar o acceso ao coñecemento lingüístico.
Para Rinoceronte e TICGAL, este lanzamento é un exemplo de colaboración privada impulsada desde a sociedade civil, sen intervención de administracións públicas, que pon en valor o compromiso co desenvolvemento cultural e tecnolóxico de Galicia.
“A iniciativa alíñase así con principios de sustentabilidade e responsabilidade social, facilitando o acceso á cultura e promovendo o uso da lingua galega a través da tecnoloxía”, sinalan, engadindo que “estamos ante unha iniciativa privada nacida na sociedade civil, onde dúas empresas suman esforzos por iniciativa e con recursos propios, para impulsar a súa lingua da man da mellor tecnoloxía”, apuntou Óscar Beiro, CEO de TICGAL.
Neste contexto, sinala que “este proxecto demostra que a tecnoloxía e a lingua non son mundos separados. Desde TICGAL cremos firmemente que o galego ten un lugar no ecosistema dixital global, e Rinodicionarios é un exemplo concreto de como a colaboración entre empresas pode facer realidade ese compromiso sen depender de axudas públicas”.

O Concello da Coruña forma ás pequenas empresas no uso de ferramentas dixitais para a mellora da xestión

S. P. — 2026-05-07T08:20:00Z

O Concello da Coruña organiza entre os meses de maio e xuño un programa formativo en intelixencia de negocio que consta de varios ciclos formativos gratuítos, con inscrición previa. Os módulos impartiranse no Centro Municipal de Emprego Papagaio.
Os cursos (con inscricións en liña en cada ligazón) por impartir son: Extracción e análise de datos con Excel (Power Query e Pivot): 7, 11 e 12 de maio, Desenvolvemento de cadros de mando con Power BI (I): 14, 19 e 21 de maio; e Desenvolvemento de cadros de mando con Power BI (II): 26 de maio, 2 e 4 de xuño.
"As institucións públicas están para axudar aos pequenos emprendedores. Por iso desde o Goberno de Inés Rey poñemos recursos ao seu dispor, afondando en cuestións que impulsen a innovación e a eficiencia a través de formacións gratuítas como estas que permitan actualizar as formas de traballar e competir nos mercados modernos", subliñou o concelleiro de Educación, Formación e Innovación Dixital, Juan Ignacio Borrego.
Lembrou que a Intelixencia no Negocio ou Business Inteligence (BI) é un conxunto de ferramentas, tecnoloxía e procesos encamiñados a converter os datos en información e a información en coñecemento para a toma de decisións. O programa é integral e progresivo cunha estrutura modular que permite facer cada un dous módulos de xeito independente.
Estas formacións están recomendadas para persoas que teñan un dominio intermedio de ferramentas como o Excel ou Power B, e deben dispoñer dun portátil co Excel instalado. Todas as sesións son en horario de 17.30 a 19.30 h.

Nintendo anuncia por sorpresa un remake de Star Fox 64

Marcus Fernández — 2026-05-07T08:00:00Z

Nintendo anunciou a pasada noite nun directo sorpresa un novo Star Fox para a súa consola Switch 2. Neste Star Fox Direct participaron Shigeru Miyamoto e Yoshiaki Koizumi, e deuse a coñecer que o novo título verá a luz o 25 de xuño e supón unha reinterpretación completa de Star Fox 64 (coñecido en Europa como Lylat Wars) cunha actualización profunda tanto a nivel visual como narrativo.
O xogo recupera a estrutura e os escenarios do clásico de Nintendo 64, permitindo volver a percorrer planetas como Corneria, Fichina ou Sector Y ao mando do Arwing, xunto a personaxes habituais como Falco, Peppy e Slippy. Mantense o enfoque sobre raís, con certo grao de control para realizar manobras, acelerar ou frear, así como as seccións alternativas co Landmaster terrestre e o submarino Blue Marine.
Incorpora diálogos revisados, novos deseños de personaxes e escenas adicionais que amplían a historia orixinal. O modo campaña ofrecerá varios niveis de dificultade (incluíndo unha opción máis esixente sen continuacións tras perder todas as vidas), mentres que o modo desafío permitirá repetir misións con obxectivos inéditos e condicións específicas.
Entre as novidades destaca a integración de controis tipo rato na Switch 2, que tamén habilitan unha experiencia cooperativa: un xogador pode pilotar a nave cun Joy-Con mentres outro se encarga do armamento. Tamén será posible empregar o mando clásico de Nintendo 64 para recrear a experiencia orixinal.
O modo batalla regresa con enfrontamentos entre os equipos Star Fox e Star Wolf, tanto en local como en liña, incluíndo opcións como partidas privadas ou uso de GameShare. Os combates desenvolveranse en distintos escenarios con mecánicas específicas, como o control de zonas, a recollida de cristais de enerxía ou a recuperación de carga espacial.
O xogo integra tamén funcións sociais a través de GameChat, permitindo o uso de avatares baseados nos personaxes da saga que replican as expresións faciais dos xogadores en tempo real.
Este lanzamento marca o regreso da franquía tras case unha década sen novas entregas principais e chega pouco despois da presenza de Fox McCloud en Super Mario Galaxy: La Película.

Vídeo no que se anuncia o novo Star Fox