O CPETIG convídanos a probar a súa nova web

O Colexio Profesional de Enxeñaría Técnica en Informática de Galicia (CPETIG) ten nova web a disposición dos internautas. Podemos vela en cpetig.gal, con dominio galego, polo de agora compartindo andaina na Rede co sitio antigo, cpetig.org, dende onde se nos convida a probar o novo espazo en liña e as súas diferentes posibilidades e funcionalidades. E que nos ofrece agora cpetig.gal? Pois, dende o plano visual, unha disposición dos elementos que nos libera a vista de todo o que se poida interpoñer entre nós e a información. O coidado no deseño, moi visual e accesible, compleméntase cunha distribución clarificadora e sinxela dos contidos.
A web fornece de seccións que nos poñen ao tanto de todo o relacionado co colexio, cos seus servizos, coa información xerada dende o seu seo (sección novas), coa documentación do CPETIG, cos datos de contacto e cos pasos que hai que seguir para levar a cabo a colexiación. Tamén se fai especial fincapé en servizos como o CEPRAL (o servizo de Certificación de Experiencia Profesional para Recoñecementos Académicos e Laborais, achegado polo CPETIG), o Plan Colégate ou as accións de análise, formación e divulgación que desenvolve anualmente o colexio (como por exemplo a Xornada de Informática Xudicial ou o Curso ENS, entre outras moitas actividades).